RAMHUAI LIAMKAWN BUNG 3-NA

KHAWNGAIHIN COMMENT TE MIN LO PE THIN TURIN CHHIAR TUTE KA NGEN A CHE U.

                      Burma ram (Myanmar) Kawlphaia Kawlho chenna khaw hlun tak pakhat "Yazachu" an tih chu Kalaymyo biala awm a ni a, chu khuaa Kawl puithiam Phungi (Monk) U-Awbatah chuan "He lai hmunah hian tun hmain Luseite pawh an lo awm tawh țhin a, Lusei awm hmasa chu Zachula a ni," a ti mauh mai a. An Puithiam lehkhabuah chuan Lusei chanchinte an lo ziak a, chu lehkhabu chu Tahan khaw President Pu L. Manliana, Antifacist Peoples freedom lraque party (AFPFL) chuan a hawh a, kawl upa țawnga ziak a ni a, tuman an hrethiam hlawm lo va. Pu. L. Manliana chuan Lehkhabua inziak ang ang chu a ziak ngai ang thlapa ziak chhuakin a kawl țha a. A hre thei tur leh sap țawnga letling thiam tur an mitsir a, chu chu 1954 kum a ni.

Kum 1966 a lo herchhuak a, Mizoram (Lushai hills) chu ram buai a lo ni a. Chu buaina chuan Burma-ram Kalay leh Kabaw phai pheia Lusei fate pawh nasa takin a hrut a. Tualchhung pa valai, nula leh tlangval thenkhat chu Mizo volantear-ah an inpe a. Buaina chuan zual lam a pan chho zel a. Kum 1968-ah chuan Mizo volantear-a inpe Luseifate chu an țhenawm leh anmahni unaupuite ngei mai chuan an hek ta a. An hekna lehkha chu dawhkanah an tiang vum thur mai a ni. Mi tam tak an man a, lung inahte an tantir hlawm a. Kawlphaia cheng zo hnahthlak hnam hrang hrang chu an phek buai ta chur chur mai a ni. 

Zo hnahthlakte inpumkhatna vaw keh chak zawk zawk mi țhenkhat chuan Kawlphaia Luseite dinhmun rawt hniam chu an thil chak ber zu han ni teh tlat a!! khual thu thang mak pui pui lah hriat tur a tam nasa mai a, "Mizo volantear-ho an lo lut ang a, Kalaymyo sipai Camp an rawn bei dawn" tih thawmte a ni nuk mai a, chuvang chuan, sipaieh party hruaitu țhenkhat chuan Kalaymyo an rawn beih chuan Tahan-ah bomb thlak nghal tur tiin sipai camp-ah Tahan-a thlak mai theih turin bomb an kam sa rup mai a ni.

Kawl phai Mizote dinhmun chu a țha lo hle mai a, Pu L. Manliana chuan lehkhabu chu a kawl ngam ta lova, kum 1968 khan a ti riral ta a ni.

Mahse, Lusei-ho chuan an unauten chutiang khawpa hekna an thehlut chung pawha an bei let ve miah lo mai chuan, Lusei-te chu hnam inphahhniam tak an ni tih sawi ngai lovin a tarlang mai a. Sipai lalte ngaihdan leh sipaiin Luseite an hmuhdan pawh a rawn danglam ta a, zawi zawiin boruak a dai ve ta a ni.

Zawlaidi Țihbaiawm

Khampat atanga chhuah lamah chuan Zofate chanchin chhuina kawnga hmun pawimawh tak luahtu "Khampat Bungpui" an tih chu a ding thim khung mai a. Hlam sawmhnih leh pali vet laia lian a nih avangin a zâr hlim chin ngawt pawh hrai hmun zeta zau a ni a. Hmun thumah tiang hrawl pui pui thlakin, chhim leh chhak hawi zawngin a zâr kur bum mai a ni. 

Bungpui țhut hmun ațanga lung vawm phak, hmar lam hawi hretah chuan kawl phai leilet bawha pem lut Khawmanga te nupa an cheng a. Anni hi, Mizoram buai hma lawka Tuithaphai (Manipur) ațanga pem lut an ni a. Zo-hnahthlak hnam peng zinga Thahdo hnam niin, Khawmanga nupui Lamcingi chu mi țawng tlem leh hmeichhe zawiawi tak a ni nghe nghe.

An nupa chuan kawla ni chhuak chhiarin ramdaiah sadai ek an hampherh nitin a. An țhahnem ngaih luat ahleiah, zan lama hun awl an han neih ve chang pawhin thiam hnâng dehna hunah an hmang ta țhin a. Chuti ang taka țhahnem ngai nupa chuan mi khawngaih thlâ an la a; an thlanga cheng ve Kawl-ho pawh chuan an buhzem kotlangah an dahtir reng reng țhin a ni.

Kum 1969, Țau thla a ni a, kum dang zawng aiin țhal a nâ dawn niin a lang a, khua a lumin ni pawh a sâ țha vawl vawl hle mai a. Ni khat chu, Khawmanga chuan an kawmchara lenhmui kung zar awn dû mai chu a kit a, a zâr țhenkhat chu an pindan chhuat țhawmmawlah hmangin, țhenkhat erawh khumpui-za atan a hmang bawk a. Mak deuh maiin, Khatia Khawmanga'n lenhmui kung a kih lai khan, a nupui Lamcingi pum leh a tai bawr vel chu hmuithala vih ang sawk sawk hian a rawn nâ zawk zawk țhin a, mahse; rei loteah a dam chawpchilh ve leh mai a. Amaherawhchu, Khawmanga lenhmui kih avang hian an nupa chungah eng thil țhalo nge rawn thleng dawn tih reng an dawn phak lo a ni.

Vawkhniakzawn thla a ni a, mi țhenkhat chuan vaimim thar hmasa an kek țan tawh a. Zan khat chu, Khawmanga te nupa tui taka an muhil bawrh bawrh lai chu vawi-leh-khatah chiang lutuk hian an harh hlawl mai a, eng thilin nge rawn tiharh erawh an hre si lo. An han mu leh dawn a, an muhil thei ta reng reng lo va. Chutah Lamcingi pum leh tai bawr chu hmana a nât dan ang chiah mai khan a rawn nâ leh ta chiam mai a, chumi zan chuan awm nuam lo fê hian an tlaivar ta ringawt mai a ni.

An vawkin no a neih zanah ruah a sur buan buan mai a. Zanlai vel a ni hial tawh awm e. Kawmthlang lama thawm engemaw vang hian pa ber mutui lai chu a ti harh zawk a, lalțin herh engin thawm rawn chhuahna lam nia a hriat chu tukverh atangin a zu bih a, thil phei vuai hi chiang takin a zuk hmu thei a. Thawm a reh leh takah chuan mut leh tuma a inher lai tak chuan a hnungzangah tak hian lung sawl deuh lungthu tiat vel tur hian a rawn vawm dawp mai a. Chumi thawmah chuan an nu pawh a rawn harh ve nghal a.

A rawn vawmna lung chu an han en chiang a, chuti khawpa ruah sur nasaah chuan huh vek awm tak a nih laiin a hul phiang mai a; lung lian taka vawm chu na viau awm tak a nih laiin Khawmanga chuan nâ a ti hauh lo thung a, mak an ti em em mai a ni.

Ni khat chu huan mawngah hna thawkin an nupa chuan an țul hle a. Chutia an țul lai chuan in chhûngah kangmei chhuak thawm leh mau châng puak ri tuar tuar thawm an hria a. An in chu an han thlir a, chutah in chu a lo kang hluah hluah mai a ni. Thlabar baklengin kang țhelh tur chuan an tlan a, mahse; in chhung an han luh chuan kangmei a lo chhuak hauh si lo. Tapchhakah pawh meiling hmuh tur awm lovin a lo dai diak mai si a, a ngaihna hre lovin an hawi an hawi mai a, kangmei chhuak lo vanga an lawm viau rualin an thil tawn mek chu an hlau ang reng hle lawi si a. Nu ber phei chu amahin a khawsa ngam mang lo a ni.

Zan khat chu zan lai velah an mutna chhuat, țhawmmawl dona zawn chu nâ tak hian a ri dawt mai a. An hriat dan chuan khanchhuk sang tak ațanga patling chhuat laia zuang thla dawt hi a ang ber a. An in pawh a nghing lawih thei hial a. Pa ber chuan lalțin nen a han en kual a; chhuat laiah chuan tuisik hunna hlumbel a lo inkhaikhup vû mai a, mak an ti kher mai. Chumi zan ațang chuan a khattawkin chhuat laiah khuhhriang te, hlumbel te a lo inkhaikhup vû thin a. Mihring tinâ zawng chuan engmah thleng lem lo mahse zanah thawm mak leh thil danglam tak tak a thleng fo mai a ni. 

Zan rei tawh lamah an chhuat dungah mihring ke pen țhiap țhiap thawm an hre thin a. Mahse, a titu an hmu thei țhin si lo va. Mak deuh mai chu, zan tin phei zawng thil danglam thleng lo mahse, thil danglam deuh a rawn thlen dawn apianga nu ber Lamcingi pum leh a tai vel rawn nâ ziah țhin mai chu thil mak tak a tling a, chu chuan hlau leh thlabarin a siam țhin a ni.

Lamcingi pum nâ chu a hma aiin a nâ zing tial tial a, a nâ zual tulh tulh mai bawk a. A pasal mangang luhai ta pheng chuan Gorkhali hnena an lei bawngpui nufa chu cheng 40-in Pu Zadova hnenah a tiral a, țum hnih ngawt mai Kawl-puithiam leh aienthiam a ruai a. Ramhmul damdawi nen tawk fang an in enkawl hnuah pawh țhat lam reng an pan theih chuan loh avangin an buh leh bal, an vaimim nen lam senghawi tawh lovin kum 1970, Mimkut thla-náwi lam khan an phungbawmte awmna Manipur lamah inenkawl turin an let leh ta a ni.

Chutia Khawmanga te nupa an thang bo takah chuan an chenna in leh hmunhma chu tû dai loh leh luah lohvin a ding țawl ta reng a. Kum khat dawn damdawi tlana an thang bo hnu chuan, Lamcingi pawh dam hrisela inngaiin an nupa chuan an chenna hmun hluiah an kir leh ta a. Natna mak tak tuara hun engemaw ti chhung an awm hnua Lamcingi'n damna a han chang leh ta chu hringnun bung thar an kai hi a ni hawt a, an hlim em em mai a ni.

Mahse, vanduaithlak takin Lamcingi chu a rai thei reng reng lo va. A han rai ve chang pawhin mi-ro an tih ang, mihring pianhmang ang tak, dum ngil ngel, phunchawng zung phoro ang maia ro țhit țhet hi a hring ta thin a. Țum hnih ngawt mai chutiang mi-ro chu a hring a, an nupa chuan fanauah an rual-awtin vanduai an inti hle thin a. Mahse, an harsatna chu engtik niah emaw chuan sutkiana a awm an ring tlat mai a ni.

Zan khat chu Lamcingi pum a rawn nâ leh a, mak deuh mai hian, uluk taka tel țhat leh kawnghmang nei taka phiar niawm tak, sam hlawm sei tak tak a luak chhuak ta țeuh mai a ni. Chutiang sam hlawm chu țum li ngawt a luak chhuak a, Saichhunga pa phei chuan sam a ni lo, thangțung zung a ni tiin a sawi hial mai. Chung sam chu thlangraah an dah a; mahse miin dawi hnathawh a ni e an tihsak avangin an hlauthawng chuan meiah an halral nghal vek a ni.

Tuk khat chu, Khawmanga chuan lenhmui kung a kih ațanga an tluan loh tak riau dan chu a man thiam țan ta a. Khumpui za atana a hman lenhmui thing leh khum ke hunna chhuat chu a țhiat a. Chutih lai chuan an vawkpui chuan an tuala ba hung chu a lo nawr ve buan buan bawk a. Khawmanga chuan kalkhang dotu lenhmui țhawmmawl chu a han phawi dawn a. Țhawmmawl chu sawntlung hian a lo char nghet tlat mai si a. Chutah, vawi-leh-khatah a han phawi hlawl mai a, a phawi rual chuan tual chara an vawkpui tla țha hle hle lai chu a tlu tawp a, a khur chur chur a, a thi ta der mai a ni. Chumi hnu ațang chuan an in hnuai, khumpui zawnah chuan arbawm tia tia hian sawntlung a rawn pawng so ta thluah mai a. Han rawt hniam thin teh mah se, zan khat thil thuah a ngai ang chiah khan a lo insiam khat leh lûk mai țhin a ni.

Ni khat chu, chhuat laiah nu ber nuamsam lo chu a tluzal a, a lo muhil hman a. Chutia a muhil lai chu rawn khawihtu an awm avangin a harh thut mai a. Inbengkangin a han indap vel a, chutah a silhfen chu mawihnai lo takin a lo inhlim vek mai a, a puanbih phei chu a thler vek nghe nghe a. A ngaihna hre lovin a hawi a hawi mai a. Kawngkhar zawng zawng chu pangngai takin a la inkalh țha thiap hlawm si a, a hlau lutuk chu a țap lo chauh a ni.

Chutiang thil chu nitin phei zawng thleng lem lo mahse, mangpui a man a piang erawh chuan khel lovin a silhfen chu a lo inhlim țhin a, a mangang em em mai a ni. Lamcingi chuan an in chhungah an mi hriat ngai loh, hmuh theih si loh, a rim leh a che vel dan erawh hriat theih ruak si hi a cheng ve niin a hre ta a. Mahse, han tih vak ngaihna an hre si lo.

Khuangchawi thla a ni a. Zan khat chu ruah a sur bur bur mai a. Nu ber mu tui lai chu a rawn țe chhuak țhawt mai a. A țap hlawp hlawp a, a muhil leh ngam bar tawh lo va. Khua a lo var a, a pasal hnenah chuan a mumanga thil thleng chu a hrilh ta chauh a. A mumangah chuan, mi pakhat samkir leh mitkhur thuk lam deuh, pa airia lampang hian ani chu nupa nun hmanpui tumin a lo bei chiam mai hi a lo ni a. Hemi țum ngat phei hi chuan a silhfen a thler mai bakah a hnungzang leh a khel bawrah kuta țhamna hnuhma te a lang kiau kuau a. Mumang rama thil thleng mai nia a lan laiin, a taksaah erawh a tak ram ngeia thil thleng angin hnuhma hmuh tur a awm tlat mai si a ni. Chuta țang chuan an ngaih a ngam thei ta ngang lo va. An tihngaihna hre lo mangang bawk si chuan, Khampat khaw chhuah lama Kawl-ho chenna Thlangkawl khuaah aienthiam nia an sawi Kawl puithiam pakhat an ruai ta tawp mai a ni.

Kawl-puithiam hnenah chuan, kawlphai an luh tirhin hetiang harsatna an tawh ngailoh thu leh, lenhmui kung an kih ațanga an nupa an tluan loh tak riau dan te, nu ber a han rai ve chang pawha fanau an hloh zel dan te, an inchhungah mi tu tih hriat loh a cheng ve tlat nia an hriat thute an hrilh a. Tin, nu ber chu mangpuiin a tihbuai fo țhin thu leh, chutiang mangpui a neih chuan mi tu tih hriat lohvin a rawn khawih ziah thin thute chu zep leh belh nei miah lovin an hrilh ta tawl mai a ni. 

Kawl-puithiam chuan an nupa thil tawn chu mak a ti hle mai a, Lamcingi chu a khawngaih em em mai a ni. Kawl puithiam chuan thla fang lan theih hnuah dâr-bêl a la a, dârbêl chhungah chuan duli tlang dahin, thla fang a vanlaizawl hun a nghak leh a. Tichuan, Khawmanga te nupa hmaah a dârbel chu kuahin a han chhamphual vel a. Nakinah chuan Khawmanga hnenah tihian a hrilh ta a.

"In nupa hian in chenna hmuna thil thleng mek hi in hre miah lo a nih hi. Hmu thei ni ngat ula chuan in duhlo khawp ang. In awmnaah hian tunhmain Shan-tlangvalin a dawi thil "Âng-lung" a phum a, chu chu Zawlaidia chang mai tur a ni. A chak nasa hle tawh mai si a, a phumtu hi tunge a nih ka hre mai thei bik lo va, ar thisenin kan dawr thei mahna. Kan dawr hlawhtling hlauh a nih chuan a reh hlen dawn a; mahse, kan tisukuk palh a nih hlauh chuan i nupui hian tuar chhuak zo turin rilru leh ngaihtuahna a nei tawh si lo va, a nunna chu a maipar thlawn hlawl mai dawn a ni.

He Zawlaidi thang hi hre miah lovin in khawih mai si a. Chu-a chhapah, khumpui tlangah leh țhawmmawlah te i hmang lehzel bawk nen. Khawih phak renga awm ta reng chu i nupui hi Zawlaidi thangah chuan a awk ta a ni. I nupui hi he zawlaidi thang hian a ngaihtuahna chawpin a awk vek tawh a, a tuallim lo tulh tulh ang a, a phumtu hian a nunna pawh a duh hun hunah a laksak thei tawh dawn a ni. A awmzia chu duh hun hunah a thlarau chu a laksak tawh mai dawn a ni, a thingkung ber i kit bo tawh si a, muangchang chi a ni tawh lo, chuvang chuan zanin la la hian he thang awk atang hian i nupui hi kan phelh vat a țha ang, naktuk zan pawh a tlai lutuk tawh ang," a ti ta a. 

Khawmanga te nupa chu an hlauthawng hle mai a. Chumi zan la la chuan Khawmanga chuan ar dum pakhat a man a, Kawl puithiam nen chuan lenhmui kung a kihna lama kal tur chuan an insiam ta chuk chuk mai a ni.

Zan thil ngang a nih avangin khua chu a thim chhah hle a. Meichher chhiin kawmchar tul hmun lam chu an pan zel a. Nakinah chuan Lenhmui kung bul lam, saipir chen vela sang, Khawmanga kih ngei kha an hmu ta a. A lei seh atang hian tuk a lo chawr duah hluah tawh mai a. Chu ve leh Kawl puithiam chuan eng mah nghak khawtlai lovin lenhmui tukchawr chu a tuai bal hlawk hlawk a, ar chu a talh a, chhamphual bul bul pahin ar thisen chuan thingbul chu a han far kual a. 

Tuibur hmuam dak hun awm veng vawngah chuan Kawl puithiam chu a ding hlut a; mahse, rei ding lovin a țhu chawpchilh leh ta a, a chilte a chhak ang țhawt țhawt a, thingbulte chu a kutin a han chul leh ang thuak thuak țhin bawk a. Rei fê hnuah puithiam chu a tho va, Khawmanga chu a kal hmasak tir a, in lam panin an hawng ta a. Kawl puithiam chuan tihian a hrilh leh ta a.

"Zanina kan Zawl-ai chu a thin a chhe hle chherh chhawrh mai, kan hlawhtling lo țhelh a ni, kan thilpek a lungsik vek tawh hnuah i nupui hi kuttualleichhama chhuah a tum fan a; mahse, ar thisen khan a tha a tițhum tlat tawh si a, a thin a ram takzet a nih kha. I nupui hi zawl-ai phumtu khan thlah hreh hle mahse a thlah lo ngamin ka ring lo. Thlah lova a lo tihlum a nih ngat chuan a chung a pik hle dawn a, chu chu a tuar ngamin ka ring lo a ni. He thil titu hi tlangval niin, ran a vulh hmain Dimapur -ah pawh rangkachakin a sumdawng tawh nghe nghe. Mahse, helai hmun an chhuahsan dawn lai hian an inchhungkhurah buaina namen lo an tawk a, Shan ramah an chho ta a ni. A phumtu tlangval hi nupui nei lovin a sumdawnnah mi kut tuarin a thi tawh niin a lang; mahse, a thih hma daih khan he zawl-ai nena indi turin a thlarau kha a lo chhiah fel diam tawh a. Tuna kan thisen chhiah hi a thlarau hnenah daih a nih avangin a buaithlak hle a ni.

A dawi âi hmanga a lo phum "âng-lung" kha, a thlarauvin hmeichhia a zawl ve nana kum tam tak liam taa a phum a ni a, chu chu i lenhmui kung kih tak zung pui khan a zem tlat mai si a, chuvang chuan i nupui chungah a țuan ta a nih kha," a ti ta mai a, Khawmanga te nupa chuan mak an ti kher mai.

Mak tak maiin Kawl-puithiamin Khawmanga te nupa buaina ar dum thisena a thawi zan ațang chuan, an nupa chungah chutiang harsatna leh buaina chu a thleng leh tawh ngai lo a ni.

Tin, Kawl puithiam thil sawi kha a dik leh dik loh fiah nan Khawmanga chuan, lenhmui zung chu a lai ta ngat a. Dung pil fê a laih hnuah hlumbel pakhat thingzungin a bawh khat tlat hi a lai chhuak ta hlawl mai a. Chu hlumbel chu an han khawng keh a, a chhungah chuan lung tung sawl deuh, kuttum pahnih tia aia hrawl hret hi a lo awm a. Chu lungtum chu miin mak tiin an en huai huai mai a ni.

Chu lungtum chu puanin an fun a, khum hnuaiah an dah țha a. Khawmanga nupui Lamcingi chu țha taka raiin fanu duhawm tak a hring a. Mahse, mak tak maiin hlumbel chhunga lungtum an phawrhchhuah, khum hnuaia an dah țhat reng țhin kha, nau an neih zanah chiah chin hriat lohin a bo daih ringawt mai a ni.

An nupa chuan leilet tha tawk tak neiin ran rual an enkawl hnuah, Khampat khaw chhuah lam, veng daideng lamah kum khat zet an cheng leh rih a. Chumi hnu chuan an ran leh leilet tiralin 1974 kum tir lam khan Imphal-ah pemin Kangla vengah an in bengbel ta a ni.

Sipaite thlarau inlar

Kum 1978, vawkhniakzawn thla a ni a. Ni khat chu Pi Thangtawii leh a fapa Lalchhawna chu leipuiah an feh a. Thlam an thlen chuan ruah a la tlak fuap fuap avangin Pi Thangtawiin chuan siksil khumin thlam thlanga bawkbawn rah chu a lo mawlh mawlh a. Lalchhawna chu thlam hnuaiah hrei-hâ suihin a faifuk rut rut a.

Chawchhun an fâk dawn lai tak chuan leipui mawng tul hmuna batling chu a che leh deuh luih țhin a. Lalchhawna te nufa chuan sakei emaw tiin an thlir reng a. Pi Thangtawii chuan, "Mama, thliin a chhem che vel mai mai a nih dawn khu," a ti a. Lalchhawna chuan an changpuihnaha an chawfun chu a țhet ta a. 

Leipui mawng lam chu Pi Thangtawii chuan a zuk mitsir zauh a, chuta a thil hmuh chu mak a ti kher mai. Chulai leipui mawng vaimim hmun ațang chuan sipai tam tak an rawn inzui chhuak ta nguah nguah mai a, an hmel pawh a lang chiang hle hlawm a.

Pi Thangtawii chuan chawfun țhet mek a fapa Lalchhawna chu leipui mawng lam en ve turin a kut hian a han zaizir a. Chutah Lalchhawna'n chung sipaiho inzui nguah nguah a han hmu ve thut mai chu a mengphawk nasa ta mai a, a la naupang deuh bawk si a, a hlau lek lek hial a.

Chung sipaiho chuan an mahni rawn hmu ve awm pawhin an lang lo va, hmalam panin vaimim dinna chhim lam ațangin leipui hmar lam pan chuan an inzui nguah nguah mai a. Ruah sur tluk tluk mahse an hmel, an pianhmang leh landan chu chiang takin an hmu thei a, lukum beng khuh an khum a, silai ngul sei an pu lawr ngoh hlawm a, an kawng achin hnuai lam erawh vaimim hnahin a hliah avangin a lang chiang thei lawk lo va. Mahse, leipui daitlang an sut lai chuan an pheikhawk bun sang tak mai, khup thleng hiala sang chu an hmu thei ta bawk a.

Hmanhmawh taka kal an nih loh avangin an hmel ngui nghiai pawh chu a lang chiang hle a. A hmasa ber ațanga a tawp ber thleng khan chhiar dawn se, vawi za aia tam fê chu an chhiar theih an ring a ni. An rawn lan tirh atanga an liam kim vek thlengin Lalchhawna te nufa chuan thlam namthlak ațangin an thlir reng ringawt mai a ni.

Mak tak maiin chung sipaite chu ruah sur buan buan laia kal an ni nangin an thuamhnaw reng reng chuan huh hmel a pu ve hauh lo va. Ruah sur karah a hmasaa kalin a puanzar a vai pharh leh lawp țhin a. Thlaizamna te chu hrelo ang maiin an tawn tlang hmiah hmiah a, mahse; thlaizamna chu engmah chhia awm lovin a pangngai vek lawi si a. Tin, leipui dai pawh chhe miah lovin an tawn tlang miah miah mai a ni. A hnuhnung berin leipui dai a paltlang lai chuan a hmasaa kal khan kawr lehlama vang hmun an thleng daih tawh a. Lalchhawna te nufa chuan chung sipaiho chu mak ti takin an thlir liam ta a ni.

Sipaiho an kal liam diak hnu chuan Pi Thangtawii chuan an rawn chhuahna dai tlang leh an liamna dai chu a zuk chian vel a. Chutiang sipai za tam tak kalnaah chuan hnuhma eng mah hmuh tur a lo awm hauh si lo. An thil hmuh chu ramhuai sipaite an ni ang e, a ti ta ngawt mai a ni.

Pu Vanthanga chuan he thil hi tunhmaa Japan Sipaiho thlarau nia arin thu a sawi țhin a ni.

Ramhuai Sipai indo

Lalauva te lo chu buh a tulzum phat ațangin sanghalin a bei nasa hle mai a, hawp khawp thar loh an phang hle a, Lalauva chu sanghal vengin a riak reng țhin a.

Inrinni tlai lam a ni tawh a, Lalauva chu khuaah hawn tumin a phur chu thlamah a tiang uaih mai a. Thlam hnuaiah chuan a mangkhawng te a han chhuang leh te te a. Chutih lai chuan a vaibel thlam sutpui a nghentir chu a lo tlu leh bak țhin a. Chutiang chuan a han dah leh pawhin țum hnih țum thum a tlu leh zel tho va. A thiltih mek chawlhsan meuhvin a vaibel chu ngun takin a han en a, a nghawr leh dar dar țhin a.

Chutah a thlam kiang velah chuan thil ri vung vung thawm hi a hre nghal zat a. Rei loteah sipai thuam inbel mihring tam tak hi thlam thlang ruamah chuan an in sam ta chiam mai a ni. Silaiin an in kap ulh ulh bawk a, thlam hnaih fe feah patling pakhat leh pakhat inpawmchilhin an in sat sen zuai zuai mai a ni. Mi țhenkhat hlauvin an tlanchhia a, ko panga ram-theihai kung diar vet zeta liante chu an tawn tlang hawk hawk a; mahse, theihai kung chu a chet hian a che aih si lo. Tin, a kung pil han khawk hlek hmuh tur pawh a awm țhin si lo a ni.

Chung sipai insual buan buante chuan, amah Lalauva chu en pawh an en chhete lo va, rawn hmu ve awm pawhin an awm lo hrim hrim mai a. Thawm na tak chu a khat tawkin a puak durvdur reng bawk a. A hlawp hlawp hian an buai buaiin an phek buai chur chur mai a ni.

Chutia an buai nuaih nuaih lai chuan thlam leihka atana an dawh, thingse ril mawih tawh lam pakhat chu a tliak rup a, vawileh-khatah chung silai kap ulh ulh thawm zawng zawng chu a reh nghal duak a, a reh hian a reh nghal vawng vawng mai a ni.

Mak deuh mai chu, thlam kianga rawn insualte khan Lalauva hmuh lai rengin thlam tuala vaihlo leh dipui chu an sat leng ur ur si a. Mahse, chung ho an bo tak diak hnu chuan vaihlo leh dipui chu tuma khawih chet loh ang hian an awm ngaiin an awm thlap vek a. Kut han thlakna hnuhma awm reng a awm si lo a ni.

Lalauva chuan indona tuala ramhuai sipaite rawn inlar niin a ngai a, mak a tiin sawi pawh a sawi chhuak duh lawk lo va; mahse, kum 1966-a Mizoram (Lushai hills) chu ram buai a lo nih tak hnu khan, indona rapthlakzia a sawinaah a sawi chhuak ta chauh a ni.

To be continue....

Book Cover