Sport leh Entertain chanchin lam hi ziah dan kalhmang bik riau a awm a; ziak ngai lo nafam chuan, han ziah ngaihnawm viau dan pawh ka hre ve lem lo a. Amaherawhchu ngenna a awm miau avangin khingbai leh ulhbun takin ka rawn thailang ve thawr a ni e.
Awmze nei tak leh kalhmang felfai zawka Football khelh a nih ațanga vawiin ni thleng hian, Footballer leh player hrang hrang ten, inches 28-a mum (sphere) ball hmangin hming ropui tak tak an lo chher tawh țhin a. Chung Footballer ropuite zingah chuan Diego Maradona tluka chanchin chhia leh țha ngah hi sawi tur an tam awm lo ve. Football atchilhtute leh Football ngaina ve lem lo te pawhin ama hming avangin Football khawvel an lo hmelhriat phah hialna a nih avangin a vanglai hun liam tawh mah se, mite thinlungah Diego Maradona hming hi a dai thei tak tak lo a ni.
Maradona hi amah ngaisangtute chuan an dah chungnung viau a; hnungzuitu leh pathian ang hiala betu kohhran bik a nei lehzelna hian tunlaia Footballer hmingthang C Ronaldo leh Messi-a te aia a chungnung bikna a tarlang chiang hle awm e. Maradona Kohhran chu, "Maradonian Church" tih a ni a, "Maradona tan hian kan rinawmna zawng zawng kan hlan e" tih a tawp mai. Tin, 'Maradonian Church' thurin inngahna bulpui ber chu, tuilêt hmalam leh hnulama infiammi piang tawh zawng zawng zingah Maradona chu a la ropui ber tih a ni tawp mai.
Maradonian church hian Dan leh Thupek (commandments)
Kan hriat țheuh angin, Diego Maradona hi khawvel footballer piang tawh zingah ani tluka field chhung leh pawna chanchin ngah leh inhnialna chawkchhuaktu hi an tam lo hle a. Chuvang chuan Khawvela Football a awm chhung chuan hriat reng a hlawlh tawh dawn a ni.
Khawvelin Maradona hming a chhinchhiahna ber chu, 1986 kuma Argentina leh England an innuai țuma feet 5.4 chauhva sang, Maradonaa'n a kut hmanga "hand of God" a siam kha a ni. Former Argentine footballer chuan kum 1986 World Cup-a England an hnehna kha Fakland thliarkar inchuh boruak vanga Argentina-in Britain-ho laka phubâ a lakana (retribution) a ni a ti mauh mai.
Argentina leh England hi kum 1966 World Cup-ah khan quarter final-ah lo insu tawh a, chumi țum pawh chuan boruak a țang țha et-awt hle a. Argentina player zinga pa rothap zet mai, Antonio Rattin chu hnawhchhuah a ni nghe nghe a, mahse, khelmual atangin a chhuak țha duh tlat lova, minute 9 chhung inkhel tihtawp lailawk a ngai hial a ni. Chutiang boruak kara khawsa an nih avangin Three Lions (England) boss, Sir Alf Ramsey thin tuarlo chuan Argentina player-te chu ‘Ramsa’ tiin a ko ta piap piap mai a, tihdan pangngaia an lo chin țhin, inkhelh tawpa an jersey inthleng tawn pawh a phalsak ta lo a ni.
Chutiang thil a thlen mek laiin, ram pahnihte inkara inhuatna tizual turin
Kum 1982, April atanga June ni 14 thleng khan Argentina leh British chu Argentina ram bula awm Falkland thliarkar inchuhin an indo chiam mai a. He indona (Falkland War) avang hian Argentine 648 leh British sipai 255 ngawtin nunna hlu tak an chan phah a. Ralthuam tam tak tih riral anih bakah hlimpui tuar mi engemaw zat an awm bawk a. Hetih lai hian England (kumpinu) chuan Argentina aiin indo-lawng leh lawng-sipai lamah a hausa fê zawk si a, chuvang chuan Falkland thliarkar chu England (United Kingdom) kutah lakluh a ni ta nge nge a ni.
He indona avang hian ram pahnih inkarah inhmelmakna nasa tak a pian phah ta reng a. Tin, Argentina leh British chu ui leh kel thlun pawlh ang hlauh an ni a; an inkarah boruak țang țha et awt chuan hmun lailum a la luah reng a. Chuvang chuan, Argentina chuan khelmualah tal phulak ngei ngei chu a tum ruh hle a, remchang hmasa bera thungrulhna peklet chu a thu rolum a ni tawp mai ani.
Hun a kal zel a, an indo ațanga kum 4-na, 1986-ah World Cup chu Mexico ah nghah a ni a; quarter final-ah ram pahnih te chu an intawng leh ta chat mai a. England chuan tuifinriat zau tak chungah Argentina chu lo tlawm tawh mahse khelmualah na na na chuan Argentina chuan England lakah chaklo nih an tumloh mai bakah tlawm a tum lo bur mai a ni.
June ni 22 ah England nen Mexico city-a Estadio Azteca-ah quarter finalah an innuai ta a, hemi țum hian football khawvela dai thei ngai tawh lo tur thil chhinchhiah tlak tak pahnih chu Argentina chhuanvawr Diego Maradona chuan a thlen tir a, minit 51-naah a kut hmangin tilut a, goal-ah pawm anih tak avangin, "Hand of God goal" an tih chu a piang ta hlawl mai a. Tin, goal hnihna a tan, "Goal of the Century" an tih mai, goal thun azawnga ropui ber mai chu a rawn piang leh ta a ni.
Hemi kum hian England chu a che sawngnawi angreng hle a; nimahse, Gary Lineker-a chetthat zar an zo chho zelin Poland leh Paraguay te meuh pawh tukdawlin quarter final-ah an invawrh chho a, team hlauhawm zingah an chhuak ta thuai a. Argentina pawhin an kawng dal tum world champion Italy leh champion tura rinkai ber Uruguay chu nghawk thluin team hlauhawm ber zingah an rawn chuangkai ve bawk a.
Hetih lai hi Khawvel mipuiin a hunlaia khawvela player man to ber nihna țumhnih ngawt lo hauhtu Diego Maradona chetla lai vel chu hmuh an chak vanglai tak a ni a, player malkhaiah chuan khawvel mit fukna ber a ni awm e. Maradona hi Mexico World Cup an khelh lai hian khawvela player tha ber anga ngaih a nih laiin, England goalkeeper Peter Shilton pawh a ropui vanglai tak a lo ni bawk a, boruak a sosang kher mai.
Tichuan, Estadio Azteca, Mexico City-ah inkhel entu mipui 114,580 zet hmaah indona avanga inhawsa ram pahnih te chu an innuai tan ta a. An khelh țan phat ațangin Argentina chuan inkhel an thunun zawk a, goal thunna remchang vawi engemaw zat an nei a, an shoot mawlh mawlh a ni ber mai. England goalkeeper Peter Shilton chuan a dang mawlh mawlh bawk a, England tan Peter Beardsley chuan minute 13-naah goal thunnna remchang tak nei mahse Argentian goalkeeper kut ban zet Nery Pumpido chu a paltlang thei bik lo va, 0-0 in chawlhlawk an hmang phawt a.
Tichuan, Second half an han țan leh chu an țan ațanga minute 6 ral hnuah thil mak leh thil dangdai a thleng ta tlat mai! Maradona chuan England goal hnaihah ball a dawng a, The Three Lions (England team) defence karah hui lutin Jorge Valdano chu in-one-two pui a tum ta. Valdano chuan ball chu a la per ta a, chu chu England defender Steve Hodge chuan pet chhuah mai a han tum a; mahse, an goal lamah a pet kang ta hlauh mai a.
Chu ball kang chu feet 5.4 leka sang Maradona leh feet 6.1 zeta sang England goalkeeper Shilton ten boruakah an inchuh ta a. Chutah, Maradona chuan phakar chhuahin a kut veilamin a beng goal ta zeuh mai a ni. A ben goal veleh Napoli ( Italy team) chhuanvawr Maradona chuan a goal thun chu lawmin a tlankual chiam a, thil thlendan chiang taka lo thlirtu a thiante chuan lawmpui ngam mai lovin an thlir țhuap a, chutah, a thiante chu a goal thun lawmpui turin a la sawm zui cheu mai.
Chutah le, England player Terry Fenwick chuan hma hruaiin a thiante nen Tunisian official referee chu an pan a, ben goal a nihzia an han hrilh ngial a. Mahse, Match referee Tunisian; Al Bin Nasser chuan a kuta a benglai a hmuh ve miau loh avangin thu tlukna dang a awm thei ta chuang lo, goal-ah a pawmsak mai loh nakah!!!. Tichuan, Football khawvela la thleng ngai lo, ‘Hand of God’ an tih chu a piang ta a ni.
Tichuan, inkhel chu an chhunzawm zel a, a ben goal ațanga minute 4 lekah Maradona chuan amahin Yard 60 zeta thui ball tlanpuiin England outfield player–Peter Beardsley, Hodge, Peter Reid, Terry Butcher leh Terry Fenwick te a bum a, hemi țum hian Terry Butcher phei hi chu a bum nawn nghe nghe a ni. Tichuan, England goal keeper Shilton man hman lek lohvin a thlawh phei a, 'Goal of the Century’ a piang leh ta!!!
Hemi țum hian Maradona chuan yard 60 a thui ball a khalh chung hian, England goal-a thun turin second 10 chiah hun a hmang thung a. Tin, mi 6 bumin ball vawi 11 a khawih hman bawk a ni. Tunge fit lo tiphal tehlul ang ni!!!
England hian hemi țuma Golden Boot dawngtu Lineker hmangin minute 81-naah an si phurh sut then mahse an chak zo ta lo a ni.
Hemi țum hian, Argentina chuan semi final-a Maradona goal hnih thun hmang hian Belgium an tla a, final-ah Germany an hneh leh a, champion nopui mawi tak chu an dawm ta a ni.
Hemi țum hian, Maradona chuan, "Khawvela English ho thil ka rukah chuan a fuh ber a, hnehna kan chan phah reng a ni" a ti hial. Tin, a ben goal chungchangah khan, "Ka thianten min lawmpui hun ka nghak, mahse tuma’n min lawmpui mai si lo. Lo kal thuai teh e, chuti lo chu referee-in goal-ah a pawm lo mai ang e ka tih hnuah min lawmpui ta a ni,” a ti nghe nghe.
A chanchin kalzel
Maradona hian a hnu zelah chanchin mawihnai lo tak tak a hnuchhiah nual mai a, Barcelona chuan kum 1982 khan world-record fee £5million in Boca Juniors atangin an lo lei chhuak tawh a, mahse Spanish La Liga-ah buaina lian tak a tawk a, Spain World Cup-ah khan red card a hmu bawk. Tin, kum 1978 World Cup-a Argentina an champion țum khan mak tak maiin ram tan koh a ni tlat lo.
Athletic Bilbao player ‘Bilbao Satalh Liana’ an tih mai thin Andoni Goikoetxea chuan Maradona ngal ruh a tlawh tliah sak. A dam hnua Copa del Rey final-a an inhmachhawn dawn tumin inkhelh hmain player ahnih te hi an intibuai nghal a. Inkhelh laiin Goikoetxea hian tlawh nawn leh a tum a, boruak a sosang hle a, hemi țum hian, Barca an chak lo ta a ni.
Chakloh leh thinrim fawmkem mek Maradona chu an hmelma fans ten an au el, pa-tê thin a thawk a, Bilbao player Miguel Sosa tauh luiiin Bilbao player Miguel Sosa a hmaiah a nghawk chawrh bawk a. Tichuan, inkhel zawh rualin team pahnih player te chu khelmual chhungah an inphek sual zui a. Maradona chuan, Spain-a buaina neuh neuh a neih avangin a world record fee vekin Italy club Napoli a pan leh ta a ni.
Neapolitan newspaper pakhat chuan Maradona an la thei hi a’n lawm mai mai khawp a, “Roreltu (Mayor), in, school, bus, hnathawh tur nei lovin kan khawpui thianghlim lo mahsela a pawi lo, Maradona kan nei a, a tawk,” tiin an ziak hial.
Naples khawpui a luh hian amah ngaisangtu mi 75,000 ten lal hmuahin an lo hmuak a, hemi țum hian an club chu a țunhnih nan Italian champion an ni a, kum 1989 khan UEFA Cup title a lakpui leh ta a.
Milan player ni țhin, Franco Baresi leh Paolo Maldini te khan, No 10 ha lartu Maradona hi an hmachhawn tawh zinga ven hneh har ber niin an sawi țhin a, Napoli pawhin an dahsangin an chhuang thiam viau a, a chawimawi nan an club Jersey No.10 chu tuma hak loh turin squad no ata an awltir ta hial a ni.
Mahse, lawmman dawn kawngah a vanduai kan ti thei awm e. Kum 1995 hma kha chuan European player ni lo tan Ballon d’Or a dawn theih lohva, Fifa World Player award chu kum 1991 atang chauha sem a nih bawk avangin kum 1982-1990 vela a vanglai hmang Maradona hian heng chawimawina lian thamte hi a dawng hman ta lo a ni.
Kum 1991 ah drug test a nei a, chumi tum chuan cocaine a hmang tih hmuhchhuah a ni a. Damdawi hman phal loh a hman avangin thuneitute chuan thla 15 (kum 1 leh thla 3) chhûng inkhel thei lovin an hrem a, tin, khatih hunlaia a khelhna club Napoli chuan a nungchang that loh avangin US $70,000 ngawt an chawi tir bawk a. Chuvang chuan kum 1994 World Cup, USA-ah pawh khan a hmel hmuh zui tur a awm ta lo a ni.
Kan hriat țheuh angin, Maradona hi field chhung leh pawna chanchin ngah ber pawl a ni awm e. Engpawh nise, vawikhat pian mana khawvel mipuite hriat reng tura record a siam thei hian a taimakzia leh mi bik a nihna a pholang chiang hle a. Chanchin mawihnai lo hnuchhiah nual mahse kum 1986 World Cup-a, England lakah minute 5 chhung leka a chet dan avang khan khawvel hian a chhe zawng leh tha zawngin a hre reng tawh dawn a ni.
Diego Maradona apologises for smoking cigar in Russia
ReplyDeleteDiego Maradona has apologised for violating ongoing FIFA World Cup non-smoking rules after puffing a cigar during Argentina’s 1-1 draw with Iceland in Moscow.
Read More to why he smokes @ https://www.thekillerpunch.com/diego-maradona-apologises-smoking-cigar-russia/