GLOBAL CYBER-ATTACK TURU BER KHA

          Cyber lama kan mi thiamte cho chhuah nan Cyber attack chanchin tlem ka han thai ve a ni e.

Mizo upate chuan khawchin leh nau chin a hriat loh an lo ti thin a; mahse, tunlai thiamna hmangin khaw chin leh nau chin pawh tawkfang chu a hriat theih tawh a, nu chhul chhunga nausen insiam lian pawh radiology thiamna hmangin a pianțo țhat leh țhat loh te, mipa nge a nih hmeichhia tih thlengin an hre thei vek tawh a. Tunlai thiamna kan tih, nitin khawsaknaa kan hman tangkai nghal theih thiam thil (science & technology) tangkaizia hi sawiin a siak lo a ni ber e.

Mihringte finna leh thiamna sang chho zel chuan hmanraw țha leh changkang tak tak a rawn chhawp chhuak zel a. Kan nun leh kan hna engkim mai hi Computer-ah hian a innghat vek tawh a tih theih awm e. Amaherawhchu, natna hrikin mihringte min bei țhin ang deuh hian, chu kan thil hman țangkai em em, kan nun nena inngheng renga kan dah computer chuan beih a tawk ve fo țhin va. A chang chuan natna hrik (virus) do zo lovin a chauh chhiat phah der thei a, enkawl thuai a nih loh phei chuan Virus vanga damkhawchhuak zo lovin a chhiat hlen phah der thei a ni.

Cyber khawvel bikah chuan Computer virus aia chimawm hi tunlai khawvelah chuan a vang kher awm e. Kan hna leh kan thil neih engkim mai hi computer-a innghat vek a nih avangin a him loh mawlh kan hlau a, kan hlauh ang ngeiin a lo him reng seng bik țhin lo va, a chang chuan Virus chimawm tak duangchhuaktu hnenah a zing thingpui man tur kan pek a țul phah ta țhin a ni. Anih loh chuan kan computer khawla kan file pawimawh dahthatte leh a system-te hi mit khap kar lovah a tichhe vek thei thin a ni.

Computer Virus amaha ințai darh thei hmasa ber chu, kum 1999 ațanga hriat țan Melissa Virus a ni a. He thil hi a thawk chak fû mai a, Computer pakhata a luh tawh chuan, email hmangin computer dang 50-ah a inthawn darh nghal a. Computer 50 atanga a han thawn darh leh zet chu a țaidarh chak fû a ni ngei ang, Computer company lian tak takte pawh an buai nghal rap mai a, Microsoft leh Intel-te phei chuan an company rawn rûn tur lo intlawhkhalh nan reilote chhung an khawlte an chawlhtir vek a ngaih phah hial a ni.

Kum 2000-ah virus chikhat a rawn chhuak leh a, he virus hming hi I LOVE YOU tih nimahse, a hming phu lovin a che chimawm a, a chhuah atanga reilote chhungin computer tam tak a rûn hman a ni. Email hmang bawkin a țaidarh a, computer-a file pawimawhte tichhiain, email mumal lo tak takte a thawn darh chuai chuai mai a. He virus chimawm tak hian ni kua lek chhungin computer maktaduai 50 teh meuh a rûn hman a ni. He virus hi rin phak bakin a darh chak a, Virus paih vat a nih loh chuan mit khap kar lovah computer a chhe nghal mai țhin a ni. He I LOVE YOU virus hian pawi lian zawk a khawih hlauin ram venhimna lam khawihtu department tam tak chuan an virus an paih hma zawng an network-te an off vek a ngaih phah hial a ni.

An sawi dan chuan, he virus hnathawh chak dan hi Net azirin mit khap kar lova khawvel pum tuam chhuak hman tura ngaih a ni an ti mauh mai. Eng-le khaw-le, keini awm hmuna mifate siam chhuah sa pawh hmang thiam hleithei lotena virus hnathawh kan lo hmelhriat dan chuan, heng virus chimawm takte hian computer a rawn luhchilh tawh chuan computer chu a buai a, a hnathawh a mumal loh mai bakah file pawimawh a tichhe vek thei thin tih a ni.

Mihring thiamna a sang chho zel a, Cyber khawvel chuan kan nun a luah khat a ni ta ber a. Cyber khawvela cheng nafam chuan cyber beihna (cyber-attack) pawh a thleng ta fo mai. Cyber kaltlangin miin sum leh ro thil an khawlkhawm a, cyber kaltlang bawkin cyber suamhmang-hovin mi an rawk ta fo bawk a ni.

Cyber attack hi khawvel ramchang zawk leh cyber hmang țangkai zual ramte chuan an tuar nâ zawk nge nge țhin a. May 2017 khan khawvela Cyber-attack turu ber a thleng a, ram tam tak chu an buai ngang mai. Kha Cyber-attack thleng khan khawvel hmun hrang hrang ram 150 chuanga Computers 200,000 chuang fê a rûn hman a. Asia ram pawhin a tuar hle a, India rama Cyber-attack awm thei tur ngaihven pawl pawhin emergency meeting pawimawh ko nghalin, cyber-attack laka lo inven dan an sawiho chuk chuk a nih kha.

Kha Cyber-attacker kha malware chikhat "WannaCrypt ransomware" tih a ni a. Virus chi khat rawn țaidarh chuan UK, China, Russia, Spain, Singapore, Japan, Indonesia, South Korea, Germany etc rama Hospitals, Universities, Railways, Gas Stations, Manufucturer leh Sorkar hmun pawimawh a khawih chhe hle ni a sawi a ni. Tin, Hitachi company, Japan-ah harsatna an tawh phah nasa hle a, an emails te hawn theih lohvin a awm a, Fedex company te leh Nissan motor company te pawh a khawih buai hle a ni.

China-ah ve thung chuan Universities a khawih buai nasa hle a. Qihoo 300 tih chuan inralrinna sang ber "red alert" chhuah nghalin attack laka lo inven dan an dap nghal ruai mai a ni. Petro-China Gas Stations pawh harsatna tawk zinga a langsar pawl tak a ni bawk. Cyber-attack vanga buai zingah Russia pawh a bang bik chuang lo va, Railways Stations a khawih nasat bakah Russian Central Bank pawh a bei nasa hle a ni.

Indonesia-ram Jakarta khawpuia Cancer hospital lian ber Dharmais hospital, mi 100-200 enkawlna pawh he "ransomware" virus hian a bei nasa hle a, an emails a khawih buai avangin hospital-a Computers 70% vel chu bungraw hnawkah a chhuah hman țhelh a ni.

He ransomware hi Australia pawhin a buaipui hle a, South Korea rama Business hmun pui pathum pawhin an buaipui niin South Korea President chenna Blue House chuan a sawi bawk a. Tin, EU rama Cyber-attack invenna lama hmalatu Europol hotu Rob Wainwright chuan, tun tuma cyber-attack thleng hi khawvela cyber-attack thleng tawh zinga a lian ber (biggest cyber-attack) a ni, tiin a sawi hial a ni.

UK lam pawhin an tuar a, National Health Services office chu beih niin, Cyber-attack awm thei laka invenna committee sang ber "COBRA" meeting ko nghalin inralrinna dar an vaw hial a. Spain rama Telefonia-communication company lian pawh he cyber-attack hian a bei bawk a ni.

Hetianga Cyber-attack a rawn awm thut hian sum chan a awl viau a ni ngei ang. US Cyber Consequences Unit, non-profit research insitute chuan he WannaScrypt ransomware hian US$ tluklehdingawn man zet thil a khawihchhe dawn niin an chhut hial a ni.

He Ransomware hi kum 1989 daih tawh khan a lo lang tawh niin Symantec Cyber-Security firm chuan a sawi a. AIDS Trojan angin, WannaCrypt ransomware chu US$ 189 man angin a lo lang a, chutianga email vela thuthawn PDF hawn chakawm tak angin a lo lang a; mahse, an hawn chuan, an Computer kha a khawih chhe nghal țhin niin an dawi a ni.

He malware WannaCry hian computer-a file-te chu hawn theih lohvin a kalh tlat a, a hawn nan attacker-te hian $300 zel an phût a. Ni thum chhunga an phût zat pêk an nih loh chuan an sum pek tur chu a lêtin a pung ang a, ni sarih chhunga an pêk loh phei chuan an file-te chu an chán hlen dawn a. Tin, Sorkar damdawi-in, industry leh company hmun pawimawh tam takah he malware hi a ṭaidarh avangin an file pawimawh hmuh lêt nan sum tam tak an seng ta thin a. Hetianga sum phûta mi computer tibuai ṭhin malware-te hi 'ransomware' an ti a, Cyber kaltlanga inrawkna chikhat a ni ber awm e.

He Global Cyber-attack turu tak hi tu tih nge??? tunge Attacker ni ang? tih hi khawvel zawhna a ni ta.

Global cyber-attack a thlen rualin a titu, a kaikuang ber chu khawvelin a dap nghal a. Khawvel huap meuha Cyber-attack vanga buaina a chhuah takah chuan ram inmelh-rum em em Russia leh US chu an ngawi vung vung bik tawp lo mai. Russian President Vladimir Putin chuan, "Kha Global Cyber-Attack turu tak, ram 150 chuanga Computers 200,000 tichhetu kha US thiltih a ni," tiin a puh ta țawl mai. A sawi zel dan chuan, khami atana malware siamtu leh tidarhtu chu America niin, Russia chuan invenna an neih that vangin, thil pawi lutuk a khawih lo a ni, a ti bawk a. Tarlan tawh angin Russia chuan he Cyber attack hi a tuar lutuk lem lova, Russian Central Banks leh Railways lam tlem azawng a khawih tih loh chu sawi tur lian tham a awm lo.

US erawh chuan Russia puhna hi thu belhchin dawl lo niin a indawi thung a; mahse, țhenkhat erawh chuan US atanga put-ru niin an ngai mauh mai. An ngaihdan chuan, US National Security Agency ten kha malware kha an siam chhuak a, hacker hoten an ruk sak veleh a ni, an ti bawk a.

Ngaihdan dang lehah chuan, Attacker-te an han chhui khan, tute nge an nih tih erawh hriat chian a har fû dawn tih a lang reng a. Mahse, an hmanraw hman (hacking tool) kha NSA-in terrorist leh American hmelma dangte computer khawih rûksak nana an hman ṭhin Eternal Blue niin an hre ta tlat mai a ni. A chhan chu an hmanrua kha, Attack thleng hma April thla khan Donald Trump-a dodaltu mi ṭhenkhat Shadow Broker an tihte chuan an lo ruchhuak hman pek a, chuvang chuan he attacker-te hi anmahni ngei an nih an ring a ni.

He global cyber-attack chungchangah hian ngaihdan a tam, pawm dan lah a tam. Hetih lai hian Google Security Researcher lam erawh chuan North Korea a kawk daih mai a. Researcher Neel Mehta chuan, kha thil "global cyber-attack" kha North Korea thiltih niin a puh hmak mai a ni. Neel Mehta hian chhan leh vang awm lovin North Korea hi a puh mai bik hauh lo va, an kuthnu leh method atang a teh deuh ber niin a lang a. North Korea hian kum 2014 khan Lazarus group hmangin Sony Pictures a lo bei chiam tawh a, a hlawhtling thawkhat hle nghe nghe a. Chumai bakah, kum 2016 a Banglades rama Bank atanga US$ maktaduai 80 ruk chhuahna te nen thuhmun deuhvin an puh a. Tin, Neel Mehta hian, Piyoyang atanga hacker te thiltih nen a lo kal dan inang chiah niin an sawi tlat mai a ni.

Eng-le khaw-le, 2017 May thlaa Cyber attack kha a turu hle mai a, ransom-malware WannaCry hmangin khawvel 150 chuang a tuamchhuak a, reilote chhungin Computers 200,000 chuang a rûn chhe hman a, global cyber-attack thleng tawh zingah a la turu bera ngaih a ni.

Man Attacking Cyber System