KA PÛ DAMLAITHLÂ

              Damlai-thlâ chanchin an sawi a piang hian ka pu damlai-thlâ chanchin hi ka hrechhuak ziah țhin a. Damlaithlâ kan tih hi mihring hmelhmang leh che vel, an thawm hawha ramhuai inlarna tih hi ka pawm ve dan chu a ni a, thil sawi fiah thiam har tak a nih avangin thil mak huanga han rinluh loh chi niin a lang tlat lo a ni.

Ka pu kha, chutianga damlaithlâ neia a hnawksak zawng leh mi rikrap zawnga khawsa chu a ni hauh lo nangin, a natnain a taksa a hneh viau tak hnu leh, a damkhawchhuak tawh dawn lo a ni tih inhriatna thuk tak a neihna zawk khan a ngaihtuahna vak vel kha a thlâ-ah a rawn chang ta pawh a ni mahna! Khami țum tih loh kha chu damlaithlâ a neih thu hriat a ni lo va, a nei tih pawh tu khawkhain an hre kher awm lo ve.

Ka pu damlo a han zual tak tak mai țhin kha chu ka Pi kha a mangang thin teh e. Amah buaipui reng reng khan a tlaivar lo chauh țhin kha a ni a. Hah lah a hahpui narawh e.

An in chu, a hnuai kang sang veh vawh tak niin, in hnuaiah patling duhtawka kaltlang halh halh theih khawpa sangin an sa a. Thlifim a dawngin han lawiluh vel pawh a nuam hle a.

Ka Pu kha a damloh phat ațangin a ni tela a tlakhniam avangin, ka han awmpui ve meuh chuan khumbeta a awmna pawh thla khat dawn a vei tawh a. Neih thinglungkhâwngin han enkawl ve țhin mahse awmzia a nei tam lo hle a. Mi tuarchhel tak a nih avangin a hnungzâng nâ vel pawh sawi duh lovin an mut dan ang ang khan a mu ngawt ngawt ringawt mai a ni.

Christmas a hnai hle tawh a. Mi țhenkhat chuan chhangban chhumin zan rei tak tak thleng an meng hlawm a. Chumi zan pawh chuan, ka Pu damlo buaipui phahin ka Pi chuan chhangban a chhum ve a. Ka Pu mutna kiangah khumai nghengin a țhuthluang diai a. A khat tawka thuk mei chhawm țha pahin latui a hlum melh melh a. Zanlai velah chuan belthlenga latui lum ri ral ral leh tapchhaka a chhangban chhum so ri barh barh thawm bak eng thawm mah hriat tur a awm lo va.

Zanlai âr a khuang thliai thliai tawh a. Ka Pi pum pai nuam lo chu inthiar turin kawmchar lamah Lalțin nen a chhuak a. Thla bial zan nimahse van zawlah chhum a tam avangin leilung chu fiah vak lo hian a hmuh theih riai ruai a. Ka Pi inthiar zo rawn kir leh lam chuan, in hnuaia ka Pu damlo mutna zawn vel a thlen chuan, Lalținin a en phaklohna inhnuai thim seh chinah hian ka Pu damlo khumbeta mu reng kha a lo ding ngawi reng mai a! Damlo chau tak tawh chutiang hmuna ka Piin a han hmu thut mai chu amah pawh a ding chawih nghe nghe a.

Ka Pi chuan, "Te-i pa, i lo tho harh peih a ni maw?," tiin, a Lalțin khai lohna lam chuan ka Pu lu-ah a han khawih a. Mak tak maiin ka Pu lu a khawih rual chuan leicharah ka Pû lukhum hi a rawn tla tawp mai a. Ka Pû erawh hmuh zui tur awm lovin a boral ta daih mai a!

Ka Pi chuan, mak ti zet mai hian ka Pu lukhumlum lei chara tla reng chu a chhar a, a la lum ther ther a. Ka Piin lukhum a khawih rual chuan a țim ur ur a, a hmulthi a tho sung sung thei hial a ni. Mak ti fê hian inchhungah lutin, pindana ka Pu mutna chu a va en ngat a. Ka Pu erawh a hmaa a mut dan ngai ang chiah khan a lo la mu reng mai si a! Mahse, a lukhum-lum erawh a lo khum tawh hauh lo va.

Ka Pi chuan, "Te-i pa chu rei min chenpui tawh dawn lo a ni maw, zanina i awmdan reng a mak ka ti mai," a ti rilru nauh nauh a.

Chumi zan chuan, ka Pi chu a thil hmuh avangin awm nuam tak pawhin a awm thei lo va. Ka Pû chu liam mai tawh turah a ngai tlat mai a ni. Mak deuh mai hian ka pi rinlawk ang ngei chuan, zing lam khuan-thumna khuan rualin ka Pû thaw-hah chu a rawn zual thut mai reng a. Hmanhmawh taka chhungkhat lainâ ko khawm turin kan tlanchhuak zung zung hlawm a. 

Chhungkhat lainâ leh țhenawm khawveng an rawn thlen khawm meuh chuan ka Pu chu a chau hle tawh a. A mar pawh a țai darh niah tawh a. Rei lo teah a irhfiak ak ak reng pawh a khât tial tial a. A mit ațanga mittui fim a luan ngiai ngiai hnuah phei chuan nikhua engmah a hre tawh lo. Tichuan, khawfing chah pawh nghak zo lovin ka Pu chuan mual min liamsan ta a ni.

A hnua ka Piin a sawi leh dan chuan, "I pu damlaithla ka hmuh kha mak ka tih em em a ni hran lo va, mak ka tih tak zawk erawh amah ka khawih ruala a lukhumlum rawn tla tawp mai kha a ni. Sut-awng atanga rawn thlak turin awng a awm loh bakah, a rawn tlak dan kha muangchanga dah thlak ang hi a ni a, mahse; ani chuan khatiang kha a tih theih loh tawp tur thil a ni," tiin a sawi thin.

Damlai Thla