ZAN-VAK (Pa-Sang)

Kan naupan lai khan (han ti ve khanglang ila) Zanvak-pasanga, Zanvak-paliana tih angreng kha rual u zawkte'na min tihțhaihna hmanraw lar tak a ni țhin a. A takah erawh a awm leh awm loh kan hre zui ta lem hlei lo va. Amaherawhchu, a pumrua awihawm loh khawpa lian leh sang, mihring pianhmang ang tak nei, chutiang thil chu zan lamah mi tuten emaw an hmuh thu an sawi hi hriat tur a awm ve fo țhin a. A taka finfiah harsa tak a nih țhin avangin mi tam tak chuan thil hmuhsual emaw, Ramhuaiah emaw an puh thlu ta mai țhin a. Chutih rualin mita kan hmuh ve loh vanga dawthluma kan puhsak a nih erawh chuan a finthlak loh hle awm e.

Kum 2001 kum tawp lam khan, tuna Khawbawn tlang bul țhuta Bru-ho chenna khaw pakhat Hatikhal-ah khuan, Lalzuala leh Ramthanga chu rawngbawltu pakhat hnung zuiin an zuk khawsa a. A tirah chuan khaw daideng lama mi in pakhatah an innghat ve mai a. Mahse, an thlen in naupang chu a boral tak thut avangin Tuirial luikam lamah an insawn chhuak ta a.

Lui kamah chuan diar vet zeta lian charpui kung hi a ding awn dû mai a. A hnuaiah chuan Lalzuala te chuan bektê an zar a, zanah pawh tu mah mu hrang bik awm lovin an mu tlar pat mai țhin a.

Zan khat chu, Ramthanga hi a pum a nuam lo va, mutmu tuah thei bar lovin a let a let mai a. A pum nâ lutuk mangang ta pheng chuan zan lai veng vawngah Lalzuala chu a inthiar nghak turin a kai tho va. Thla mang tawh lam a nih avangin zan rei lamah chuan an riahna chhaka ramngaw chu thla engin a chhun eng no nghual mai a.

Ramthanga chu thingkung hnuaiah hian a inthiar a, a khat tawkin a meizuk chu a pak ling leh vât vât țhin a. Lung vawm phak maia hla ațang hian Lalzuala chuan a lo nghak ran mai bawk a. Ramthanga inthiar zo rawn kir leh lam chu, a rak țhawt a, a reh zui ta vung vung mai a. Lalzuala ngaih țha lo chuan Ramthanga awmna lam a va en chuan, Ramthanga hi lungpui bulah a lo bawksawp reng mai a! A hnungah hian mi pakhat sang tak mai, thingkung ding lai hliah thim vek khawpa lian leh sang hi a lo ding reng mai bawk a! Chu mi chu a lian kher mai a, a hnua Lalzuala sawi leh dan chuan, "Mizopa in pakhat hi a karkalak thei han han ang" a ti hial a ni.

Chu Zan-vâk-pa-sanga chu Ramthanga hnungah chuan che lo chang lo hian a ding thim khung mai a. A sanzia chu an awmna zawna thla eng pawh a hliah thim khup hial a, a thlahlim pawh thingkung thlahlim chungah hian a lawr fal zuah mai a ni. A lu pianhmang chu chung lamah a zum deuh zût a, a dar a sawi deuh pun bawk a, a âwm hi hma lamah a eu chhuak ul mai a ni.

Chu Pa-Sanga chu tuibur hmam da vel zet a din hnu chuan ngaw ril lam panin a inthiarfihlim ta a ni. A sangin a lian tham bawk a, ngaw ril pana thui fê a kal hnu pawh chuan thingkung karah a lang dum nul nul thei a ni.

Lalzuala chuan Ramthanga chu a va bawihsawm a. Ramthanga hlau lutuk chu mu leh mal pawh a nei mang lo va. An riahna hmun an thlen hnu rei lo teah Ramthanga chu a khua a sik zui ta char char mai a ni.

Zingah chuan nizan lama an thil hmuh chetna leh a sulhnu vel en tumin Lalzuala leh midang an han kal leh ngat a, mahse; a chetna hnuhma emaw, a kehniak pakhat tal emaw pawh hmuh tur a lo awm hauh lo va. Mahse, ngawchhung luhna zawna thingkung pakhat lerah hian mupui bu tiat lawiha lianin Ramthanga diar sen leh ramhrui hnawk hi a lo invet khat chuat mai a. Mihringin chutiang thil han dah tur chuan a țangzâr a têin a sang hle mai si a, mihring pangngai tan tih theih chi ziazâng nia a lan loh avangin Ramhuai hnathawh niin an ngai ta ringawt mai a ni.

Ramthanga khawsik chu a zual zel avangin Hatikhal khuaah chawlhkar khat zet an cham a. An hawn dawn niah thing lera Ramthanga diar invet chu Lalzuala te chuan engemaw titiin an la thla thei ta hlauh a. An han en chiang a, diar chu thangțung hrui leh samzai hlawm nen a lo in suih nghet tlat mai a. Samzai țhenkhat chu a sei hlawm fû a, patling hlam chuang fê fêa sei te a lo ni hlawm a, mak an ti kher mai.

Diar leh sam invet bur mai chu Hatikhal-khuaa an innghahna putar chuan phelh a phal lo bur mai a, "In pawh chhiat ngat chuan diar neitu nunna hian a tuar ngei dawn, a nunna hi samzaiah a bet vâ vâ chauh a ni tawh, damdawi ei mahse a tuar chhuak zo chuang lo vang," a ti ta mai a. An phelh ngam ta lo va, mahse Lalzuala chuan ngawi rengin a hawn ta tho a.

Lalzuala chuan kum 2006 thleng khan chu diar chu a kawl țha nghe nghe a, mahse; a puzawn Pu Chalchhunga'n 'Thil hriat chian loh an kawl mawl mai mai ngai lo ve,' a tih avangin, kum 2006 ruahthimpui hawn lai vel khan a hal ral ta vek a, mak deuh maiin, hemi kum vek ruahthimpui hawn lai vel tho hian Ramthanga chu a awmna Saikawtah a thi a ni. An sawi dan chuan, Ramthanga chaw ei lai chu a tlu tawp a, a thi zui ta mai niin an sawi a, mi țhenkhat chuan Ramthanga hian arsa a hmeh a, ar ruh lem sualin a thi a ni an ti.

Hemi țuma Lalzuala te țhiandun thil tawn ang hi tawng ve tawh leh hmu ve tawh midang sawi tur an awm nual awm e. Amaherawhchu, kan hriat angin mi tam zawk hi chu kan thil tawn dangdai deuh leh mak deuh han chhinchhiah kil kel peih kan ni hlawm lo va, tin, han belhchian dawna 'Chu miin a ti, kha miin a ti,' tih vela hmawr bawk leh ta mai mai kan nih hlawm țhin avang hian han buaipui vak pawh thil zahthlak lama a kal chang a awm fo a ni.

Vawi khat chu, Pu Lalliana te chhung Luangmuala an awm laiin, Chaltlanga an tupa chu nat lawkna pawh awm lovin unauhmelhai hun velah hian a thi thut mai a. Chutih lai chuan tuna Chhang-ur kawn vel te khu a la ramhnuai hle a, thla en loh zanah phei chuan a thim hian a thim chhah mup țhin a.

Chumi zan chuan Pu Lalliana te nupa chu Chaltlang kal tur chuan an in siam mawlh mawlh a. Pu Lalliana nupui Pi Dârneihi chu pawnah a va chhuak zawk a, chutah hmanhmawh bakleng hian a rawn țe lut ta tuar tuar mai a. An pa chuan 'eng thil nge ni ta' tia a va tlan chhuah ve nak chuan, an sumhmun thlanga phulraw hung kiangah hian, mi lian em em mai hi a lo ding thim khung mai a. Amah Pu Lalliana pawna a chhuah rual chuan, chu Mi-liana pawh chu, huan mawng tuikhur lam panin a chhuk thla ta a ni. Pu Lalliana sawi dan chuan, "Raw hung bula a lo din khan, raw ler ai khan a sang mah zawk si a, thingkung emaw ka ti hman hial a ni," a ti.

Chumi zan chuan Chaltlanga an chhungte hnenah an thil hmuh chu an sawi a, anniho pawh chuan mak an lo ti ve khawp a. An zinga Pu Aihrânga chuan, "Mi-lian an tih ang kha, Zawlseia kan u Lianruma sa changin Lungdup ramah a kap ngawt pek a, a kah zan ațang khum betin a na nghal char char a. Ena mawi lo hial khawpin a sam a tlak kawlh vek bakah a beng te hi a chhet chhe bur tawh a. Amah tak phei chuan dam chhuah leh pawh a chak tawh lo hial a. An enkawl fê hnuah mi ang zan lovin a rawn țhachhuak leh thei hram a, mahse; a dam rei loh phah ta tho a ni," a ti.

Hetiang "Mi-lian", "Zan-vak-pa-sanga" an tih bawk an hmuh thu hi hriat tur a awm fo mai. Hnampui kan tih ho pawh hian a chanchin an lo ziak kur ve ngiai nguai mai a, a pianphung pawh sawi dan a inang lo hlawm hle a. Țhenkhat erawh chuan Sap-hovin "Mothman" an tih ang deuha thla hlai tak nei angin an sawi ve bawk.

Mothman han sawi takah chuan, Kum 1966, Novemner 15 khan, West Virginia, Point Pleasant hmunah Roger Scarberry-a te nupa chuan hetiang deuh hi an tawng ve tlat mai a, an hmuh hun hi zan dar 11 velah a ni a, an nupa chuan an hlau kher mai.

Mahse, anni nupa hmuh hi chu a sang lutuk hranpa lo va, feet 7 vel awrh a ni a, mak deuh maiin bak ang hian thla a nei teh hlauh thung a. A kal thei a, tin, chak takin a thlawk thei bawk a. Pu Roger-a te nupa motor chuang lai chu a um nasa mai a ni awm e. A mitmeng bial kul leh sen rum maia Pu Roger-a te nupa a han melh zet chu, thi tur riakah an inngai hman hial a, an hlau lutuk thlabar bawk si chu an thidang lo chauh a ni.

A taksa pianphung pawh an hmu hnai set sawt hle a, a vun zawng zawng chu a hmul dur mai a, a rim a chhe hle niin an sawi nghe nghe.

An hmuhna hmun hi indopui laia bomb vel an siamna hmun bulah a ni a. Mahse Point Pleasant an thlen dawn chuan a bo leh ta daih mai a ni. Pu Roger-a te chuan Mason County court-house an thlen chuan an thil hmuh chu Deputy Millard Halstead-a hnenah an report nghal a. Deputy Millard-a ho chuan an hmuhna hmunah an va kir leh ngat a, mahse engmah an hmu zui ta lo a ni.

Pu Roger-a te thil tawn hi chanchinbu lamah an chhuah chuai chuai mai a. Chanchinbu lam chuan a hming te an phuah ta nghe nghe a, a hmingah, "Mothman" an ti ta a ni.

Kum 1961 chho vel ațang khan, West Virginia, Point Pleasant, Ohio River bul velah hetiang hi vawi duai lo an hmuh thu an theh lut a. Kum 1966 - 67 chhung ringawt pawh khan mi hrang hrang 100 chuang zetin an hmuh thu an thehlut a ni.

Kum 1975- a tih chhuah John Keel-a lehkhabu ziak lar tak 'The Mothman Prophecies' tih ah chuan, ran vulhtute mak tih khawpin an ran a thi nasa a, mak tak maiin chung an ran thite chu an ril leh an kawchhunga taksa peng hrang hrang a bo daih zel mai a, chung thil titu chu "Mothman" an tih mai, thim zinga chetla thin, khawvel dang atanga rawn zin thinte an nih a rin thu a ziak mauh mai.

Pasanga (Zân-vak-Pasanga) an tih mai, țhenkhatin Paliana an tih hi zan lamah hmuh a ni deuh ber a. Mizote hi chuan Ramhuaiah kan puh deuh chawt niin a lang. Tunlai Science thiamna atang hian proved theih ni ngat se, eng thil chiah nge a nih a, khawiah nge a khawsak țhin, khawilam ațanga rawn zichhuak nge a nih tihte nen hriat a chakawm nangiang mai. Mahse, a țhen pawh kan hriat theihlohna he luikam ațang hi chuan rinhmang leh ngaihdan tlem belhin "Ramhuai a lo ni ngei e," tih mai hi a pawm a hahdam ber mai awm e.

Zan Vak