Tlai ni tla tur chu kawla liam zai relin suk chen emaw chauh kal a hmabak tawh a. Pi Numami chu a fapa Zosanga leng rawn hawn hma ngeia zanriah chhum hmin diam tumin chokâah a buai kher mai. Zanriah a han peih fel meuh chuan khua pawh a lo unauhmelhai deuh chhulh tawh a.
Pi Numami chuan a fapa chu zanriah ei turin rei fê a nghak a; mahse, Zosanga hmel reng reng a lang thei lo. Khua a tlai zel a, lenghnawt-âr pawh a khuang thliai thliai ta. Chutih lai tak chuan sumhmun ațang hian, "Mihring fapa hi chaw leh chhang chauhvin a nung lo tih i hre nang e, Lal-pitar," tiin, Zosanga zu rui chu a rawn pai lut țuang țuang mai a. Chu țawngkam ngaihno bei lo zet avang chuan Pi Numami thinlung chu hriaua chhun ang zawk zawk hian a nâ a ni.
"Bawihte, khatin mahni Nu te an ko nawmnah mai mai ngai lo, i damkhua a sei lo palh hlauh dawn asin, chaw ei tur kan nei te, ei thei tura kan nungdam te hi kan vannei hliah hliah zawk asin" tiin Pi Numami chuan a fapa chu chaw ei a han siam a. Mahse, Zosanga zu-rui lungpuam chuan "Thuiii, hetiang chawhmeh ka ei peih thlawt lo, a hmel hian i hmel tlukin luak a pawt e, dik tak chuan e, Pitar, I fapa ka lo ni kher hi ka zak bâng lo va, I mi biak nih pawh hi thil zahthlak nih a tling e, mi zingah pawh min ko leh tawh ngai suh!!" tih leh a Nu chaw ei siam sa chu chhuat laia paih a rual ta mai a!. Chumi zan chuan, veng hmawr lama hmeithai riang tak Pi Numami te in chu zurui inhrosa thawm leh bungbel tla keh rum rum thawm hian a khat tlat a ni ber e.
Pi Numami te nufa hi veng hmawr lama cheng an ni a, Mizo nu tam tak zingah Pi Numami tluka taima leh zaidam hi sawi tur an tam kher lovang tih a nih laiin, a fapa erawh chu veng khat zu heh hmingthang a nih piah lamah, tlangval sual chanchin an sawi apiangin Zosanga hming hi lam rik hmasak berah a țang ziah thung si a ni.
Pindan banga Zosanga pa thlalak intar chu, Pi Numami chuan lungchhe tak hian a thlir reng a, "Bawihtea pa, min kalsan hma lutuk hi chu a pawi mang teh e! Kei hmeichhe lungmawl leh awmnem tê mai hian Bawihtea thinlung khauh tak hi engtin nge i tel lovin ka han enkawl zui zel tak ang ni," a ti vawng vawng a, dan zawh rual loh hian a biangah mittui a rawn luang zawih zawih mai a ni.
Zosanga pa, Pu Lianzuala dam lai chuan, Pi Numami te hi chhungkaw neinung tak an ni thin a. Amah Pu Lianzuala lah chu, kamding sorkar hnathawk lian chin a nih bakah, an venga mi awmthei sa an lo ni chhap bawk nen, tlakchham a bar an nei lo hi a ni ngat mai a. Chhungpui nu Pi Numami lah, nu azawnga nu taima leh zaidam, a nulat lai pawh a, 'a hmelțhatna phena a taihmakna chuan khual a kai e' tih ngat kha a lo ni bawk nen, an vengah chuan a neinung bera chhal ngam an ni țhin reng a.
Mahse, hringnun inlumleh dan hi zawng hringfate hriatthiam rual a ni si lo. Zosanga thla hnih a pumhlum awrh tih ah, Zosanga pa chu Champhai khaw daia a Motor a siamna hmunah vanduaithlak takin rulnganin a chuk hlauh mai a. Hmanhmawh takin Champhai damdawi-in panpui nghal ni mahse, a vanduaina tithuahhnih turin damdawi-inah chuan rûl-tûr thahna damdawi (Anti-venom) an kawl loh lai tak a lo ni hlauh si a. Minit khat lek pawhin mihring thih leh dam inkarah kawngro a su thui hle tih hriain, hmanhmawh takin Zosanga pa chu Aizawl pan pui a ni a; mahse, Khawzawl dai an rap hman chauh tihah, chu rul tûr chak tak avang chuan a thlakhlelh em em Zosanga te nufa chu a kalsan ta a ni.
Chhungkaw khai-pa ber fam khua a han lawi zet zawng, Pi Numami chu a deng nâin, anni nufa tan chuan vanpui chim nen a lem chuang lo. Pi Numami chuan hriatthiam har a tiin a ât-phah lo chauh a ni a. Chu-a-chhap-ah,
Kangmei rapthlak tak chuan an thil neih zawng zawng meivap a a chantir bakah, amah Pi Numami ngei pawh chu hmuh hrehawm khawpin a tihmelhem zo a. A hmai a kang ser diai duai a, a lu a kang ser thliah thluah bawk a. Meialh sa lutuk chuan a kaihzatha te a pawt kawm zo va, ni khat thil thua hmeithai lo chang ta Pi Numami chu, ni khat thil thuah vêk piangsual kebai leh ramtuileiloah a chang ta reng mai a ni.
Nu hlim thei tak ni țhin Pi Numami chuan hlim ni hmel a hmu ngai tawh lo va, a, nun chu a ngui nghiai reng a, vanlaia tla ang riakah a inchan a, a hmel pawh hmuh theih khawpin a lang tar chak hle reng a. A chang chuan an chunga thil thleng rapthlak tak avang chuan Pathian hnenah a vui lek lek țhin a; mahse, mihring ngaihtuahna tawi tê leh mawlmang tak chu Chatuan Pathian remruat dan hrethiam turin a fing tawk lo hle tih a hrechhuak leh țhin a, an nufa chunga Pathian rawn chet hun mawlh mai chu nghakhlel takin a thlir nitin țhin a.
"Țah ni a liamin hlim ni a lo lang leh țhin" an tih angin, Pi Numami chu hun kal tawh leh fam zun ngaia indawm kun reng duh bik lovin a fapa Zosanga tan khawvela nu țha leh nu ropui ber nih a tum ta zawk a.
Pi Numami hian bazarah dawr chhetê a nei ve a. Thlai hnephnawl ilo vel khar chhawngin, chu chuan an nufa mamawh zualpui chu a phuhru ve thei mai a. Pathian zarah nghei bik lo chuan an khawsa ve nawk nawk a.A hlimna kungpui ber Zosanga hmel a hmuh apiangin a khawvel chuai tawh chu a lo parvul tha leh țhin a. A thinlung neih zawng zawng chu a fapa tan a hlan pumhlum vek a.
Mahse, a pawi ber mai chu, hmangaihna chuan hmangaihna vêk a ngiat laia hmangaihna ni lova huatna a thungrulh a lo nih hian hmangaihtu tan a runthlak a, a nâ a, hmangaihtu thinlung chu chema vih ang mai hian a nâ vawng vawng mai thin a ni.
Zosanga hian Phaiah M.A a zawh hnuin sumdawnna huangah a zuang lut a. Sumdawnna tuala lei rem a han rah takah chuan ngaizawngtu leh saisiktu pawh a ngah viau mai a. Mahse, a thil atchilh ber sum chinchang chu varpawh hle mahse, tangka hlut zawng leh hmangaihna hlut zawng khaikhin thiam hi a lo harsa a ni ang e!! Zosanga pawh hian tangka-note phen ațang a Nu hmangaihna chu a hmufiah zo tlat lo va! Rei lo teah, a zin chhuah dawn apianga a lu chungah kut nghata malsawmna dilsak țhintu a Nu chu "Ka Nu" pawh a ti duh ta reng reng lo va, a tawngtai hun chhung rei lo tê pawh atan thil-ninawmah a chang thuai thin si a ni.
A Nu thlazar hnuaia mi zah a kaina te, tun dinhmuna a din theihna te hi a Nu țawngțai rah a ni tih Zosanga chuan a hre phak hauh si lo. Chutiang bawkin, hmangaihna tel lova ngaizawngtu a ngahna chhan hrethiam tur pawhin Zu-ûm phen ațang chuan a dawn a tawi lua pawh a ni ngei ang. Rei lo teah hmeichhia leh zû vangin a sumdawnna chu a tlachhe ta mai reng a.
A pawi ber mai chu, Zosanga hian a sumdawnna tlakchhiat chhan bul berah a Nu a puh tlat mai chu a ni. Hei vang tak hian a Nu chu namen lovin a hua a, a ten a, a hmusit a, a diriam a, a piansualna te chu mi karah a zahpui hliah hliah mai țhin a ni.
Phai lama a zin hnuhnung ber atang phei kha chuan a Nu hi "Ka Nu" tiin vawitê-khat mah a ko duh tawh lo va, "Ka Nu" tia koh a hnehin "Zawngsen-nu" tiin a ko ta hial zawk a. Chutiang dinhmunah pawh chuan a fapa a sual zawh poh leh, a fapa a hmangaihna chu a thuk ting zawk a ni mai si a.
Mahse, chumi zana a fapa neihchhun Zosanga'n a chaw ei siam zawng zawng a han paih darhsak vek mai chuan Pi Numami chu a deng nâ kher mai. A rilru nâ lutuk chu chhuat laiah a tlu zawi hnawk a, dan rual lohvin a biangah mittui a luang zawih zawih a. Heti khawpa a fapa a hmangaih chung pawh a, a fapa hmangaihna a dawng let ve miah lo te, "Zawngsennu" tia a fapain mi zinga a han ko thinte a ngaihtuah chuan Pi Numami thinlung chu a puak keh a ni.
Pi Numami chu rilru nâ takin a tlukna hmun atang chuan thei leh thei lo hian a rawn inbeng kang hram hram a, a fapa hnenah chuan,
"Bawihte, ka thih hma hian vawi khat chiah i hnenah thu ka sawi duh a, lo ngaithla ning lo hram ang che aw, ka sawi zawh chuan kei chu ka thi tawh dawn a ni.
I mi hmuhsitzia reng hi hrehawm ka ti em mai. Mi karah "Zawngsennu" lah mi ti mawh hek lo.
Dik tak chuan, I hmuhsit leh I diriam em em, "Zawngsennu" tia i koh țhin hi ka nulat lai chuan khaw khat nula hmeltha ka ni ve țhin asin! I pa pawh hi khaw khat tlangval hmeltha a ni a, kan inhmangaih em em a, kan duhthusamin kan innei a, tichuan nang hi i lo piang a.
Mahse, vanduaithlak takin i pa chuan hma takah min boralsan ta si a, nang lah bawrhsawmnain a tlakbuak awl lo che a, mut i kham theih nana ka tlaivar ngun țhinzia te kha aw!!!
Heti taka ka hmel kang ser diai duai i hmuhna chhan hi eng dang vang a ni lo va, ka duh reng vanga thleng pawh a ni hek lo.
Khami tuk khan, i mamawh lam turin pawnah ka chhuak lawk a. Nang chu pawnpuia tuam chein kan khumlaizawlah ka mut che a.
Chutia ka chhuah lawk hlan chuan kan in hi a lo kang a. Kan in kang ding luah mai ka hmuh meuh chuan, a bang zawng zawng a kan kual vek tawh avangin mei-sipai kang țhelh pawlte chuan an lo thlir țhup a, tu mah țhelh ngam an awm tawh lo.
Kei chuan, hmanhmawh takin, "Bawihte, Bawihte," tiin nang chu meialh karah ka rawn zawng che a. Tu mah min chelh ding zo an awm lo. Meikhu chuan a lo bawh luih luih che a, i lo kang hman țep tawh a. "Bawihte, Bawihte" tiin, thih pawh dawn lovin meialh karah ka rawn zuang lut a, nang chu meialh karah chhantu nei lovin i lo țap ngawk ngawk a.
Ka hmuh rual che chuan hmanhmawh takin puanpui chuan ka tuam che a, thei leh thei lovin meialh ri hlup hlup kar ațang chuan ka zuanchhuahpui che a, tite hian nang chu him pialin ka chhuah ta che a ni.
Kei erawh chu nangmah ka chhanchhuahna che lamah meialhin ka lû zawng zawng tihian a lo kang chhia a, hmui hlei hmai hlei nei lovin ka hmel zawng zawng a kang chuar zo a, ka kut leh ke thleng hian himdam awm lovin a kang piangsual zo ta a ni.
Heti taka ka hmel kang ser diai duai i hmuhna chhan hi i nunna ka chhanhim vang a ni asin!
Ka nulat lai chuan hetiang ngawt hi ka ni bik lo asin! Hetia piangsual ka ni chung hian thei leh thei lovin ka kurpui che a, tite hian ramtuileilo ka ni chung hian ka chawm seilian chein ka chawm puitling che a. Ka sum dehchhuah hmasak apiang I Sikul kai nan ka pe che a, 'Tunah heti mai ni rih mah ila, nakinah chuan Bawihtea zarah pangngai takin kan la khawsa ve ang a. Ka upat hunah min chawm ve ang chu,' ka lo ti rilru ve țhin a.
I lo sei lian ta cheng a, min chawm let ve thei tawh ang ka tih laiin ti khawp hian mi zingah zakin min siam leh si a, ka rilru hi a nâ em mai a, i lakah hian ka beidawng tak zet a ni.
Kei i nu, hmeichhe lungmawl tê hian ka theihna zawng zawng sawm khawmin, harsa taka inphur bawr chungin Bazarah te ka inzuar a, i ei tur leh ka ei tur zawng reng rengin ka buai nileng a, hah pawh ka sawi ngai lo a nih kha.
Ti te hian i lo zir puitling a, mahse; min hmusit let leh si a, a dik adik chuan e, ka tan he khawvelah hian dam man a awm tawh lo a ni," a ti ta a.
Chung thu Pi Numami'n a sawi zawh rual chuan chhuatah a bawk nghal thlawp a, a rilru nât luatah a thidang zui ta der mai a ni.
Chutah zet chuan, tlangval lunglian leh ngawltawt tak, a nu hmangaihna hrethiam thei reng reng lo Zosanga chuan a Nu thu sawi chu mak a tiin ngaihnawm a ti lutuk a. A Nu, chhuat laia tlu reng, engmah hre tawh lo chu hmanhmawh takin a va pawm a.
"Ka Nu, khawngaih takin min ngaidam hram rawh aw. I thawnthu sawi hi a makin ngaihnawm ka va ti em, vawi khat chauh min hrilh nawn leh rawh, ka Nu. Khawngaih takin lo harh leh hram teh khai, ka Nu!
Heng thil hi ka lo hre ngai reng reng lo asin. Keimah vanga i tawrhna zozai hi hre miah lovin i hmai serte hi ka lo hmuhsit thin che a, heng i piansualna zawng zawng, hmui hlei hmai hlei pu lova i awmte hi mi zingah ka lo zahpui thin che a. Ka Nu pawh ti duh lovin ka lo bihruksan thin che a, heti khawpa min lo hmangaih hi a va mak ngai em! Ka Nu!!!
He hmangaihtu tawrhna thawnthu ngaihnawm tak hi, ka thawk tawp thleng pawhin ka theihnghilh ngai tawh lo vang, Ka Nu. Khawngaih takin lo harh leh la, kei i fapa sual tak hi min ngaidam hram ang che aw.
Rilru nâ leh rilru hahin vawi khat mah ka siam leh ngai tawh lovang che, Khawngaih takin lo harhchhuak leh la i fapa hi min dampui hram ang che aw, ka Nu! Engtikah mah ka zahpui leh ngai tawh lovang che ka Nu," tiin Zosanga chu a tuiral ve ta.
Zosanga chuan a nu chu, "Ka Nu" tiin vawi tam tak a han ko leh ngial thin a; mahse, Pi Numami chu eîh tur reng a awm ta lo. Zosanga chuan khawvelah mal ngawih ngawiha inhriatna lian tak a nei a, naupang tê a nih laia a nu nena an inzui hnak hnak laite kha a mitthlaah a rawn lang iar iar a, a lung a leng nghal vawng vawng mai a ni.
Zosanga chuan a Nu hnenah inchhirna mittui nen nasa takin ngaihdam a dil a. A Nu taksa zawi hniang tawh chu a mal chungah muttirin duat takin a pawm vawng vawng mai a ni.
"Pathian leh Ka Nu hmangaihna vang chauha mihring thei ve chang chang chauh ka ni"
By : Andy K Zarzoliana (KVLC)
 |
| Chunna a tap. |
No comments