Ka thianpa Andy K Zarzoliana kutchhuak, 'Arkaiden Zan' tih thawnthu hi a ngaihnawm ka ti hle a. Kum 2016 vel khan ka lo chhiar tawh a, hetianga thawnthu ropui leh ngaihnawm hi tunlaiah chhiar tur a van tawh em avangin; he ama Blog-ah ngei hian dah leh ka duh ta a. A thawnthu pumpui hi bung hrang hranga thenin, ka rawn dah zel dawn a ni. Chhiar tui le.
— Samuel Vanlalruatsaka
ARKAIDEN ZAN (BUNG 1-NA)
Ziaktu: Andy K Zarzoliana
Liankhama khua Mualsen chu in sang in an inchhal a. A khaw thleng a pharh țhain buh leh bal an mir a, an hlim thin hle a ni. Ni khat chu Lal inah Mual kil Upaho chuan zu an khawn tlut tlut mai a. Chapchar awllen lai ani bawk a, Lal mi-sa ni phak chin, mual eng hmu phakte chu an kim kher mai. Chutih lai chuan thu thințhawng deuh mai a lo thleng a.
Tlangnuam khaw upa Lalzika leh tlangval pahnih an lo thleng hlawl mai a. Lalzika chuan Lal hnenah," Hei le, in mi hriat angin thu pawimawh tak kengin kan lo kal vang vang a ni a, Nimin fehrehsan hun vel khan, Aivela sehtu sakei sual,'Sawmseha' khan kan Upa Sepui no hruai lai a seh a, a sarhu lai chuhin kan hual a. Sakeia tihlum mang si lovin hual chhunga tlangval pahnih chuan an inseh tir der mai a. Kan mangang-in bawmzo hnawhin ri thei zawng zawng nen kan hnawt a, Pangpui rama hnawh thlak mai kan tum laiin in ram chhungah a rawn kai ta daih mai a, chu mi avang chuan kan ngaih a ngam thei ngang lo va, thilawmzia thlen turin kan lo tlan vang vang ani," a ti a.
Liankhama Upate chu an ngawi deuh vang vang hlawm a. Lal chuan," Anih chu le, chanchin min rawn thlen vang vanga kan lawm hle mai, chutihrualin, Chutia kan ramchhung a lo kai ta sa sa anih chuan ngaihthat ngawt mi anih hauh loh chu, sakei sual mikhualtu nih zawng ran an rethei thin em mai, bawhzui dan tur kan lo rel thuai ang e," a ti a. Lalzika'ten hah-zu an dawm zet hnu chuan tlai thim hma ngeia Tlangnuam ban hman leh turin an hawng ta hlawm a.
Mualsen khua chu sakei sual avangin boruak a ralmuang lo țan hle a. Chuachhapah lo hal a lo hun a, ni hluiah ngei hal an tum ran bawk si a, sakei sual tlak laia hna hautak zet mai hmachhawn zawng thaw a veng lo ngei mai.
Tlai khat chu khawnbawl upa Lalauva se kikheh tir chu, se rual zingah a rawn haw ve lo tawp mai a. Sakei seh anih an ring vek a. Denghlira pa ramvak lo haw chuan nikum chul lamah se awn thawm a hriat thu a rawn thlen bawk a. Mualsen tlangval ho chu tlai thim dawn ruaiah nikum chul lam panin fei leh silai nen an tlanchhuak sung sung hlawm a. Nikum chul an thlen meuh chuan khua pawh a thimfel viau tawh a, sial chu chhuhsak ngei an tum ruh hle mai. Meichher an siam a, ngawrh takin sakei chetna chu an bawhzui zel a. Siamkunga pa thlam zawn an thlen chuan mipui thawm vang hlauin sakei chuan a sa seh lai chu a tlansan ta a ni.
Sakei sual chu a huangtau sawt hle a, dai hnaiah an hmu ta fo mai a. Thingphur ngam pawh an awm mang lo va. Tlai khat chu sakei chuan Zathanga vawkpa sutnghak rawn lak a tum a, kawmchar daiah a thawm a thawm mai a. Zathanga ui chal kumsawm zeta upa tawh pawh chumi tlai zet chuan mihring hlatah a awm ngam reng reng lo va; zun a cheh zawih zawih mai a ni. Tualchhung upate chuan hnawhbo dan kawng dap thain an hria a. Zawlbukah ro an rel khawm a, chumi zan la la chuan khawchhung mipuite chu an chhuak khawm a, dar khuang leh thil ri thei zawng zawng an khawng ri a, sakei sual chu pangpui ram lamah an hnawt thla ta a ni.
Mualsen khaw tlangval tam tak zingah, Tlangkhuma fapa Thangvunga chu a huaisen-in, sa pawh a kap thei hle a. Mi neizo chhungkua atanga chawrchhuak nilo mahse mi rilru tluang tak anih avangin an khaw nulate chuan an saisik hlawm viau mai a. An khaw nula taima leh la deh thiam zet mai, Darpuii nen chuan an inzui ngun viau mai a, lo thik fe fetu pawh an awm nawk reng a ni.
Darpuii chu nula ngaihno-bei leh nu-hniang mai hi a ni a, Thangvunga nen pawh an inawm viau reng a ni.
An inzui ngun viau takah chuan, Thangvunga pawh chuan thiktu a nei ta tlat mai a, chu chu, Lal Upa fapa Lalkunga a ni a. Lalkunga chuan Thangvunga chu kawng engkimah a er em em mai a, tihchhiat dan kawng a dap ngar ngar a, Darpuii nena an ințhenna tur anih dawn phawt chuan engmah tihhreh a nei reng reng lo a ni.
Thițin thla dein sela ki a tiat van tawh tawh a. Thangvunga leh a țhian Lalkhuma pawh Darpuii rim turin zawlbuk ațang an inzui chhuak a. Chumi zan chuan Darpuii inleng zinga Lalkunga chuan, Thangvunga chu țawngkam mawi lo leh chaldelh tak takin a țawng khum fo mai a. Thangvunga chuan Darpuii mitmei a ven avangin ngawih a chhuh a, a insum hram hram a. Leng hawn ar khuan hma hauhvin Thangvungate țhiandun chu Zawlbuk lamah an haw a.
Zawlbuk an thlen chuan Thangvunga chu Val Upaho kiangah meipui hnung puakin a ding tau mai a. Rei lote-ah Lalkunga te pawh an rawn lut ve nghal a. Lalkunga chuan Val upate pawh zah nachang hre lo lêk in, "Thangvung, in tau haw vel chai e law, nang ang hmawng hnuaia mi ve mai, ka nê pawh êk pha hlei lo tur hian, Darpuii hi rim ve fo lo mai rawh," tiin a han tawng khum sak a, Zawlbuka lawi tlangvalho chu an ri deuh hak a. Thangvunga chuan chuti teh taka Lalkunga'n a han hmusit mai chu tawrh har a ti ta em em mai a, a thisen chu a lum ta pup mai.
"Lalkung, i pu Hrangkapa ralsam kuai tawh hmel eng hi zah lo ningat ila chuan Zawlbuk atang hian ka thehchhuak tawh ang che. Chuti taka mi han hmuhsit vei ni! I ngam a nih ngai chuan i han inbei ang hmiang,” ati ta charh charh mai a. Lalkunga chuan," I neihzawhloh tur nula bula mualpho chu i hlau hle maw, I ngam a nih ngai chuan han inbei ila," tiin a chhanglet a. Thangvunga chuan, "Lalkung, mi-ah mang ka ni ngai e, hmana Aivela sehtu sakei sual a rawn luh țum khan, ‘Keipui ka-ah sâr a zam e,’ tiin tumbu ei ang țuakin i tawng khûr a nih kha le. Hmeithai zinga zang zawn ang hrimin khawiah nge i bikbo tak kha? Inbuanah chauh lo pawh ka cho ngiang mai che," ti-in a vaibel dawn a seh kep rap rap a. Chutah an puanvenah an han indawm ren rawn a, an han che tak tak mai chu Zawlbuk chhuat, Phulraw dap phah chu an ke chuan an thai khawk tawp tawp mai a, Thangvunga chu a banbul invuah a hrawl bawk a, Lalkunga chuan a lo hneh ikhaw lo mai hi a lo ni a, Thangvunga chuan Lalkunga chu a vanvawr zawngin a chawi vu vu a, chutah le Zawlbuk kalkhang pui chim rup khawp in a thlâk ta mai a. Lalkunga chuan a mi cho chu a khan lo hle tih hria in, tlawm aw dui chuan, "Vunga, cho loh val ka lo cho che a, zahngai hram teh," a tih hnuhnawh takah chuan Thangvunga chuan a kai tho duh ta chauh a ni.
Darpuii chuan Thangvunga te chanchin chu mi kâ a țangin a lo hre ve zel a. Thangvunga chanchin a chhe zawnga an sawi nasat poh leh a hmangaihna chu a zual ting mai si a. Nimahse, Thangvunga a duhna erawh pawnlang takin a tilang ngai lo va, chutih rualin, hmelma leh misualin an inkarah hem an thlak ang a, an kar thu a khi chat mai ang tih erawh a hlauh ber a ni thung.
Darpuii chu naupang tê anih laiin a pa chu lo halna ah vanduai thlak takin a kang hlum hlauh mai a. Chhungpui pa ber fam chang ta chu, kawng engkimah an hmuingil mawh hle a, an țhenawmte chuan Lal vanlunga lut mai turin anu chu an sawi hmawrhmuh fo va; nimahse, a fanu hmakhua a thlirin nitheiin a hre ngang si lo. Darpuii chu a nî-in a awm deuh chawt thin a, ama rila rah tluk zetin a hmangaih a, a en hrang ngai reng reng lo a ni.
Darpuii tuha kuai rual vel anihin anu chuan, pa nei lo ringawta khawsak chu chhuan kan chham mai dawn e, tiin an khaw țhenawma parawl Hrangliana chu pasalah a nei ta a. Chumi ni atang chuan Darpuii chuan 'pa' tia kohtur a nei ve leh ta chauh a ni a, chuti ang chu an dinhmun anih avangin Darpuii tan chuan Thangvunga chu a khawvel neihchhun a ni a, a innghahna kulhpui ber Thangvunga chu hmelma leh dawt-thu leng vel vanga chan mai a hlau a ni.
Thla-eng no nghulh mai chuan leilung a chhun eng ruih mai a. Chumi zan chuan Darpuii chhungte chu a nî damlo kan turin an chhuak vek a. Leng hawn ar a khuang thliai thliai tawh a, inlengte an țin hnuah Darpuii chhungte an la rawn hawn mai loh avangin Thangvunga chu a hnufual a. Chumi zan zet chu hmangaihna thu hla infahna hun remchang anih vei nen sawi hmasak ber tur hre lo niawm takin Thangvunga leh Darpuii chuan thuk mei vam reh lam tawh chu an melh dun ngar ngar mai a. Vawkchaw mei tuah mit tawh lam a khat tawka rawn puak leh pap thin leh thuk tlanga vawkchaw so liam rawn far leh zauh thin tihloh chu ri dang reng a awm lo.
Darpuii chuan a chil a han lem ri leh deuh khalh țhin a. Thangvunga pawh eng bera chu nge fel lo ni, a hmangaih leh thlakhleh ber ni teh mahse chumi zan zet chuan sawitur a van hle mai. A chil a han lem ri leh khalha, chutah, fan deuh raih hian," Puii, min nei duh tak tak ang em? Keichuan eng ang dinhmunah pawh ding la, ka phatsan ngai reng reng lovang che, mite angin țhi leh dar nei ve mahsuh ila nang i awm chuan engmah thlakhlelh dang ka nei lo," a han ti a. Darpuii chuan," Uvung, zep thu a cheng lo, Kei tak hian a nia ngai thin che ni. Ka thlakhlelh thin zia che hi hre ve ni ngat la chuan hmeichhe tiha mawi lovah min puh duh hial ngei ang. Ka nu hi chuan min hriatthiampui viau zel a;mahse, tlang mitmei ka veng lo thei si lo va, ka pa lah hi i hriang angin mi thin-ram leh thin butut nei mi a ni a, khuanu hian kan tan hun țha han siam thuai se ka ti thin ngawt mai," a ti a. Chutah thu dang sawizui lo chuan an kut an indawm sak a, an ngawi leh deuh vang vang a.
Nakinah chuan Thlang kawng lam atang chuan țawng ri a lo chhuak a, kaițen zawnah chuan Darpuii pa chuan a aw a thian hrawk a, an rawn lut ta a. Darpuii ni damlo chu a lo zual viau a lo ni a, chuvanga leng rei ta pawh an ni a. An damlo kan chungchang sawia an titi luam hnu chuan Thangvunga pawh chu zawlbuk lam panin a hawng ve ta a.
Chhunzawm leh tur...
No comments