Nula khawngaihthlak Darpuii chuan hmun dang han pan leh chuantur pawh hre lovin a hmuh hmasak ber thlam chu a bel chawt mai kha a ni a. Zan boruak vawt vin tuk hnuaiah chu thlam khawhar tak chuan, a pang-ti tilum turin theihna nei lo mah se, țhli leh daifim vawt ata a nun khawchhuah theihna tura zarhliahtu anih miau avangin chu thlam chu a hnuchhawn ngawt phal bik lo a ni. Chumi ni chuan, thlam thlanga kawrtui luang ri har har kiangah chuan a țhu a. A hmangaih Thangvunga chanchinte a ngaihtuah neuh neuh va, Thangvunga'n a chanchin a hriat ve hunah engtin nge a awm ang, tihte a suangtuah neuh neuh va.
Khua atanga an hnuh chhuah zan khan, a thlavang lo hauh sak a, lo chhan turin a kiangah Thangvunga awm lo mahse, Thangvunga chungah a vui phal reng reng lo va, demna thinlung pawh a nei hek lo. A hnena Thangvunga thu sawite kha thu tlingah a ruat hmiah a, a ringhlel ngai lo va, hmelma vangin he khawvelah intawng leh dawn tawh lo pawh ni se, engmahin a tihbuai theih tawh lohna hringnun piah lam ramah an la intawng ngei dawn tih a hria a, beisei tur awm lohna hmuna a beisei awmchhun chu pialral chauh ani a, a tana Khuanu remruat chu, a hmangaih Thangvunga vang chauh pawha pawmthiam a tum hram hram a ni.
Darpuii chuan Kawrtui fim vawt raih mai chuan a hma a han phih a, a harh deuh sawng sawng a. Thlam lam pan chuan a chho hna hna a. Thlam namthlak atang chuan tlai ni tlatur dul ruih mai chu a thlir reng a, a lunglenna leh khawharna hriatthiam pui ve lo niawm takin piah tlang atang thlifim a rawn thaw heuh heuh a, ani ang hmeichhe lung no sa tan chuan mittui a sawm chhuak hma kher mai. Atan chuan, turni thlak ruala chhawrthlapui lo eng leh tur chu tawrh a har leh dawn tih pawh a hai mawlh si lo.
Ni a tla fel tawh a, unau hmelhai hun zet chu ani tawh awm e. Thlam chhak deuh tukchhawr hmuna sava riak tur chiar nak nak thawm chu vawilehkhatah a reh duk a. Darpuii chu thlam banghmai nghengin a țhu ngawi reng a. Chutia vawilehkhata thawm a dai duk mai chu mak ati rilru viau mai a. Chutah thlam leikâ chu a rawn nghawr det det a. Darpuii chuan hman zana keipui kha anih a ring deuh viau a. Mahse, vaibel bengkhat zuk daih zet hnuah pawh engmah thawm a awmzui leh tawh lo va.
Chutah thlam kailawn kiangah chuan hmeichhe insut deuh faih faih thawm a hre leh a, a thova thlam namthlak atanga a zuk en chuan, a Nî damlo kha a lo ding reng mai. Puanvar a sin a, a hmel chu lapua ang maiin a dang vek a, thlam chu a rawn chhoh thlir dâk mai a. Darpuii chuan,"Ka Nî," a han ti tham țiak a, chu veleh a hmuhlai reng chuan a thamral riai riai mai a ni. Darpuii chuan a Nî chu a ngaihtuah viau mai a, a thi tawh ani tih a hrethiam nghal bawk a.
Chumi tlai vek chuan, nikum chul Sairuma thlama Darpuii niawm tak hmeichhe pakhat a tawm thu chu Thangvunga thian sabeng Lalkhuma chuan Biakhrea pa kâ atangin a lo hre ve a. Lalkhuma chuan, chu a thu hriat chu Thangvunga hrilh turin unau hmelhai hun veng vawngah Thangvunga'te in chu a pan ve nghal chat a. Thangvunga chu pawn leihkapui lerah amah chauhvin a lo țhu ngawi reng a. Lalkhuma chuan, "Khah, i awm maw, zawlbuk lamah i chuangkai daih tawhin ka ring a, Lianngura fapain ina i awm thu asawi avangin ka rawn chho anih hi,"a ti a. Thangvunga chuan," E, lo chuangkai mawlh teh khai, zawlbuk pawh khua kan thlen achin chu ka la rap mang hauh lo mai," tiin a lo chiauau thuai a. Lalkhuma bawk chuan,"Nichin mai khan, thu thindeng deuh mai Biakhrea pa kâ atangin ka dawng a, vawin Biakhrea pa ramvakin nikum chul lama Pusairuma thlamah Darpuii niawm tak hmeichhe pakhat a hmu ani awm a. Amaherawhchu Kawng atanga a hlat deuh avangin chiang fak chuan a hmu thei bik lo a i awm e. Biakhrea pa chuan kan Upate tih loh midang a hrilhloh thu a sawi bawk a. I hriat ngei tur thil nia ka rin avangin ka rawn pan chawt mai che a ni," a ti ta a.
Lalkhuma thusawi chuan Thangvunga chu a tiphu zawk mai a, a tho ta hluai mai. "Khuma, vawin khan Darpuii zawngin kan khaw ram ka fang a, mahse, khua-in min thim hnan mai dawna ka hriat avangin luhloh ram chin hmabakin ka rawn kirsan ta ani a, chutiang anih zawngin tunah Darpuii hmu turin kan chhuak rawih mai dawn em niang, Kan Upate beng a thlen tawh phei zawngin an rilru a kap nâ viau ngei ang a, mihringah kan inchan lo mai ang tih ka phang a ni," a ti a. Maltlat nun khawharthlakzia a hrechiangtu Thangvunga chuan, chutianga a hmangaih ber, a Thanghniangi rampalailenga khawhar taka a awm tur a han ngaihtuahin a awm hle hle thei lova, chhuat dungah a vei tawn sek mai a ni.
Chutia an țhianduna an inkawm lai chuan, Thangvunga nu damlo kan a rawn hawng a. Sumhmun atang chuan," Thangte, kan boruak tawn hi hriatthiam a va har em! Darpuii nî Romani chuan min peihloh san ta, zu chhuk nghal thuai teh un," a rawn ti ta a. Thangvunga'te țhiandun chu an ding chawt a, "A mak mang tak e, ani lehzel aw" tih leh chhuah an rual a, mitthi in lam pan chuan an liam thla ve nghal a.
Nakinah chuan Darpuii Nîte in chu an thleng a, thawhtur țul a piang chu an thawknghal zung zung a, khua pawh a thim fel viau tawh a. Mitthi inah chuan nula tlangval an rawn thleng zel a, Darpuii nu chuan a rilru hah luat tuk, a taksain a khawlohpui nasat tawh tehreng nen, chutianga an lamhnaiin vanvawm khua a han zawm san leh tazel mai chu nâ ati a, an tana khuarel chu a hrethiam thei mawlh lo a ni.
Khawnbawl upa Roliana chuan a ruk thei ang berin Lalkunga chu a titi pui a. "Kunga, hei, tuna i hriat angin mitthi kan nei ta hlauh mai si a, zanin ah chuan in chet chhuah a rem dawn lo niin a lang a, kan ruahmanna kan pawh fan leh deuh rih a ngai dawn a ni. Khaw mitmei thlir ran chungin naktip nakthai zanah chetthawh ta mai zawk ula, mi mutreh lai tak chuhin in chhuak hlawm ang a, nangni ang tlangval thaza tan chuan chawhma ban chauh anih avangin rei inthangin ka ring lem lova, in thiltih tur in puitlin ta maw tihah mi thawh hma ngeiin zawlbuka rawn kir leh hman in tum dawn a ni, ka sawi tawh ang khan, nangni tihloh chuan tuman an hre ve tur a ni lovang," tiin Lalkunga chu a hrilh malh malh a.
Lalkunga pawh chuan,"Ni tuk e, thu ruk anih ang ngeiin zawi tê law lawin che ila a fuh ber ngei ang, kei'man ka mi rin zual deuh leh hmui chip thei nia ka hriatte ka lo kawi dawn a, thu-put ru engmah a awm lovang, Darpuithangi chu a reh hlen vawng vawng tawh mai dawn a ni," a han ti ve a. Tichuan, Lalkunga chu tuihunna lama kawmchar kawngkhar atang chuan a chhuak ta a.
Khawhar inah chuan khawhar chhungte hnem turin nula tlangval an rawn lut tliar tliar hlawm a. An zingah chuan mi pangngai ang phazan lo Denghlira chuan Thangvunga chu a hawi leh zauh țhin a. Thangvunga chuan Denga mai mai chu engtak min hrilh tum niang maw! ani leh ni lo anga min han hawih zauh zauh chu ni, tiin pawnah chuan a va dakchhuak a. Denghlira chuan," Nuthlawi Lianthangi khan lo chho zawk teh ati," tih leh a hmui hup chu a rual nghal chuih a.
Thangvunga chu Lianthangi te in lam pan chuan a chho nghal thuai a. Lianthangi te in a thlen chuan Lianthangi pu chuan vaibel a lo pak khu talh talh mai a. Chu veleh kawmchar lam atangin Lianthangi chu a rawn lut a. Thangvunga hnenah chuan, thuruk sawi tih fahran hian,"Vunga, thu pawimawh tak hrilh duh che ka nei a, tlai thimhlim deuh khan țhenawmte chingal ka dilna lamah Lalkunga leh Liani pate inbe ru thawm ka hria a, ka awm hle hle thei ngang lova, Denghlira kha ka rawn tir tawp mai a ni. Liani pa hian Darpuii hi mi thlamah a tawm niin a hria a, chu chu, Lalkunga te hmatheha hmangin thahtir a tum ngei niin ka hria a, an sawidan chuan, naktip nakthai zanah mai hian an che dawn ani awm e. Darpuii hi ka lainat zozai lutuk tawh a, atan han tihsak theih engmah ka nei ve si lova, ka tihtheih awmchhun nia ka hriat chu amah an phiarrukna thuruk i hnena sawi hi a ni mai," tiin Thangvunga chu hlauthawng hmel tak hian a han hrilh a. Thangvunga chu a han ngawi deuh vang vang a, "Thangi, hmeichhe huaisen tak zawng i va ni lul em!! I chunga ka lawmna hi tunah chuan ka sawiseng rih lo. Ka tana i țhatna hi nakinah zawng ka la rul let ve ngei ang che, khawhar in lamah ka zuk chuangkai rih phawt ta nge," tiin Lianthangi chu lawmthu a hrilh a, a chhuak leh ta a.
A nihna taka chuan, Liankhama khua Mualsen ah hian pasaltha ralhrat leh ramvachal fe fe awm nual mah se, Thangvunga tluka sa kap thei leh huaisen, mi tlawmngai an awm lo va. Amah tluka thirdeng sa leh lal sachhiah pe ngun an awm hek lo. An lal Liankhama pawhin a thlamuanpui leh chhuan ber a ni nghe nghe a. Nimahse, Lal upa lamhnai anih loh avangin a phu ngawih ngawihah pawh chawimawina nopui vawi khat mah a la chawi ngai lo va. Upa kâ atangin chawimawina a dawng ngai hek lo.
Pasalthaa inchhal deuhte chu lal khawnbawl upa fate annih deuh fur avangin Thangvunga chu chawimawia hnekin a hmingțhatna kawngte chu an up beh sak thiam hle zawk a, kawng engkimah thik duhtu leh elreltu an lo chhuak zel lawi a. Chuti ani chung chuan, a huaisenna te, a tlawmngaihna te leh in lam leh ram lama sulsutu anihna chu a chhawmnung reng a, chawimawi phu chawimawina dawng ngai lo a ni chung pawhin a vui ngai reng reng lo a ni.
Liankhama khaw tlangval zinga Thangvunga ter pha deuh leh tluk deuha inngai chu Khawnbawl upa fa Lalkunga hi a ni ber a. Ani phei hi chuan Thangvunga chanchin reng reng chu a chhezawnga sawi loh lai anei lo tihtheih tluk ani a. Chung thil zawng zawng chu Thangvunga chuan a hai bik hlek lova, zawldawh takin a tuar hram hram a ni zawk a.
Mahse, Darpuii chunga an thil tih avang chuan Thangvunga rilru chu a nâ ngang mai. Tuna an thiltih tum mek a han hriat lek phei chuan Thangvunga chuan a thil tih duh ngai miah loh ti turin an nawrkal lui ngat niin a hria a, "Dikna humhalh kawngah chuan, pian ni nikhat, thih ni nikhat a ni ngai e," a ti ve ta charh charh mai a ni.
Thangvunga chuan, khawchhunga a mi rin ber leh a țhian sabeng Lalkhuma hnenah chuan, Laliani pate thil tum zawng zawng chu a hrilh fai vek a, "Khuma, he thilah hian nang leh midang tumah hnuh luh ve ka duh lo; Darpuii nen kan inkara hem thlaktu ber chu, kan khawnbawl Upa fa Lalkunga hi a ni a, Darpuii khawhring paia puhtu leh khawchhung atang hnawhchhuah anih theih nana a meizanghlaptu ber pawh a mah tho a ni. Naupan laia thingthu nung chawia karkawnga kan indah hlat siak hun ata tawh vawiin ni thleng hian min la er ngar ngar a ni a.
A suahsualna hi sualna vekin chhang let ve ta ni ngat ila a dam tawh kher awm lo ve. Mahse, tunah chuan tu mit-hmai mah veng lovin ka chhe ve tawh dawn a, pehhel lovin ka hmazawn chu ka tawn tlang hmiah hmiah tawh dawn a ni, a ai hnah phah pui khawnbawl upa Roliana fapa Kaphleiate ho pawh an chet ngam chuan han che mawlh teh se, ka dim dawn hlek lo mai," tih pahin a vaibel dawn a țhial rap rap a.
Lalkhuma chuan,"E khai, kei ka ban bik nachhan tur reng ka hre lo mai. Lalkunga ten chutiang thil an ti duh ngat anih chuan hmun fal laiah kan sathlum vek tur lah ni, ka alh pap mai ka ti. Ka farnute lah thisen pal vek an ni tawh a, ngaihtuahawm an ni love, naktuk chu awmni kan kham ngei turah ngai ta ila, chumi hnu chuan funpui pawh kan er mai ta lawng, hmeichhe awmnem pakhat ralpui phiar taka an phiar duh anih chuan ngawihbo mai chi niin ka hre tawp lo mai," ati châng ta rat mai a.
Thangvunga leh Lalkhuma chuan funpui an er ta tlut tlut mai a, leika hnuaia kelzun inchiah rei tawh chu an rit khawk a, chu chu chingal thlawrin an thlawra khawmhma hawl nen an denpawlh leh zet a, an mamawh tawka tam silai zen chu an nei ve ta mai a. an silai chu an tuai hnum ang hlerh hlawrh a, a zehlung bilte chu an tat-hriam ang ver vawr a.
Thangvunga chuan," Zawlbukah riak tur angin kan lut ang a, Lalkungate pawh Zawlbukah bak an lawi dawn chuang lo va, an chet hun kan ngaichang reng bawk ang a. An chhuak kim ta maw tihah an chet dan hmu phak ranin kan zui fual deuh ang a, Aivela sih zawn kan thleng ta maw tihah Sairuma thlam thlen khal ngei tumin kan tlan khalh ang a, Darpuii chu a la dam anih chuan kan hruaichhuak dawn ani. Khuaa hawnpui chi anih dawn loh avangin Zokhaw lamah ka tlanpui mai ang a, Lalkunga ten min rawn umzui anih chuan kan thal kan thlah chauh tur ani.
Kan chettum dan hi lal hnena thu thlen hmasak tulin ka hre lo va, kawngro pawh a su dawn chuang lo niin ka hria, lalin min umzui dawn anih chuan Țiau kan kân mai ang. Ka Thanghniangi tel lova dam reng ai chuan chhaka Sukte ho salah pawh kan inbarhin kan ring pawh kan rawlh mai ta lawng, kan khawnbawl upa țhenkhat suahsual vanga hrehawm taka nun hman liam ai chuan famkhua pawh lawi ila ka pawi ti hauh lo mai," tiin Lalkhuma hnenah chuan, a ruahman dan leh a thil tum chu a hrilh ta a.
Chhunzawm leh tur...
No comments