Ni khat a liam a, ni dang a lo herchhuak leh a. Nula khawngaihthlak Darpuii tan chuan hringmite chenna khawvelah hian beisei tur a nei tawh lo hi a ni hawt a. Zan a lo nih in, mut zai te han rel ve bawk thin mahse, chutiang rampalaileng leh mi tlawhpawh lohna hmun ah chuan atan thinthi leh ngaihngam taka han chhin ngamna chi a ni si lo. Varar khuan ruala kawlkil vartian lo in phan chhuak te chu a lunglenna belhchhahtu an ni mai si a. Beiseina eng nei ve tawh lote tan chuan beidawng taka nun ve reng aiin vanvawm khua kai ve daih duhna a piang fo reng a ni.
Chumi zan chu thla arkaiden zan a ni a, thlangkawl a tanga thla lo chhuak chuan a mawina chingkim phochhuah tum niawm takin thlam thlanga bung kung lerah chuan a inchhawng eng vuah mai a. A mawina tihhmelhem sak hlau niawm takin chumi zan chuan chhum reng reng hmuhtur a awm lo. Leilung pawh thui tawk tak a hmuh theih a. Thlam chheh velah chuan leihrik, perhpawng leh khuangbai chenin thla eng lawmin an bawp an khawng ri chiah chiah hlawm a. Thlam khawhar taka mahni chauhva khawsa Darpuii chuan," Aw,,, Uvung, I tello chuan favang thla arkaiden zan an sawi pawn mawina reng anei si lo," ati rilru neuh neuh a. Chumi zan chuan a chungah eng thil nge lo thleng dawn tih reng hre lovin thla eng hnuaiah chuan a thu ngawi reng a.
Liankhama khua Mualsen chu thla eng chuan a chhun eng ruih mai a. Thla eng lawm naupangte tualzawla an pawnto leih leih lai chuan, Lalkunga leh a țhiante pali chuan thu pawimawh leh hriat reng tlak, ruahmanna țihbaiawm zet mai relin Lalțhuama kawmchara ram-theihai kung hlimah an țhukhawm țaih hlawm a. An hotu ber leh inti thunei ber Lalkunga chuan,"Hei le, tukina ka sawi hmawrhmuh tawh cheu ang khan, zanin hian khawhring pai Darpuithangi tihlum turin kan che dawn ani a, thla vengah Silai leh kawlhnam a awm chuan a tawk hle turah ngai ila, thla a eng bawk a, meichher lovin kan kal hmiah hmiah mai ang. A țul chinah chauh mei kan nun tur a ni. Zawlbukah engmah ti lo tur angin kan riak vek ang a, țhiante an mutui ta maw tihah kan tho dial ang a, Sairuma thlam panin kan chhuak nghal vang vang dawn a ni, kan thil ruahman hi a tlawlh tur ani lova, tumahin an hre ve tur a ni lo," a han ti a. Khawnbawl upa Roliana fapa Kaphleia chuan," Kei, ka ngaih a țha lo riau mai, nizan ka mang kha a duhawm loh em mai a, pamțul hial ka duh lek lek mai," a ti nang nang a.
Lalkunga chuan,"Thlasik mang chhia mai mai i hlau em ni!! Mipa fa ve lem si, i pa i tithangtlawm mai dawn e," tiin a han fuih hlak a, an ngawi țhap mai a. Tichuan an nula rim țhin Lianmami te in lam pan chuan an inzui chhuk ta hlawm a.
Thangvunga leh Lalkhuma pawh an awm mai mai bik hauh lo. An thil tih tur chu lu chhum ban chhum huam leh, thihna rim keng tel riau anih avangin an inurlawk nasa hle a. An huntiam a thlen huna hman mai theih turin an kawlhnam te an han tah-hriam ang ver vawr a, tawngkawla leh pailung dah khawmnate an thuam sauh sauh va, silai zen țang țha et awt nen chhuarah an dah fel diam a.
Chumi zan chuan khaw daideng lama nu pakhat, Ramhuai-zawl nia an sawi Nuthluaii chu tuallaiah a vak vel a, ram țangrual naupang pakhat pawnto lai chu a man a, a beng nek mai a. Tlangvalho chuan Nuthluaii chu an ben ve mai an han tum ngawt a, an hneh thei ta reng reng lo mai a. Chung tlangvalho chuan Nuthluaii chu an dinhual tuau mai a. Tlangvalho zinga Lalkunga chuan," Nuthluai, nang ang ramhuai-zawl leh thla em ât mai mai hian ka nau lo beng ve ngawt che a, Darpuiithangi angin khua ațang hian kan umchhuak daih lah tur che ni, naupang pawnto i lo ben mai mai," tiin a hrawk deuh khur khur a.
Nuthluaii chuan,"Lalkung, chutia mi tih mai mai ni, i dam rei hauh lo vang, tlai thimhlim khan ramhuai ho nen i sa kan insem vek tawh," tiin Lalkunga chu a chhang let ta mai a. Tlangval ho chu an ding ngawi țhuap hlawm a, Nuthluaii thusawi chu mak an ti hle a. Ran ei lo teah Nuthluaii chu an kiansan ta hlawm a.
Leng hnawt ar a khuang thliai thliai tawh a, tlangval țhenkhat chu veng mawng lamah an la ri laih laih hlawm a. Thangvunga leh Lalkhuma erawh, zawlbukah mei lum aiin Val upate karah an țhu ngawi ran a, vaibel an pak khu talh talh a. Rei țhu lo chuan mut an siam thuai a. Thangvunga mitthla ah chuan Darpuii a rawn lang leh a, tudang reng ngai bik lova leihkapui lera thla eng an thlir dun laite, vawkchaw mei vil paha an lunglen thu an inhrilh lai te kha a mitthla ah a rawn lang a. Chutih lai chuan inneih ngei tumin an thinlung zawng zawng an inhrilh tawn kha ani a, mahse, tunah zawng Darpuii chu hmun hla takah khawhar takin a awm mek ani si a.
Lalkunga leh a thiante chu leng hnawt ar khuan hnu veng vawngah zawlbukah chuan an rawn lut ve hlawm a. Midang chu an lo mu vek tawh a. Mei lum ai khawmuang duh lovin Bahzar hnaih lamah chuan an mu tlar pat mai a.
Lalkungate rawn lut chu Thangvunga'te țhiandun chuan an lo mitsir ru ran a. Zan lai ar khuan hnu chuan zawlbuka lawilut mi tam zawk chu an hnar kak kak hlawm a. Lalkunga mu lai chu thawm dim takin a rawn tho țual țual a, a kianga mu ve a țhiante chu a khupin a han khawng harh a, anni pawh chu thawhphan at nei miah lovin an lo țhuchhuak ve hlawm a. An puan ven an han sawih chhing ang teih tawih a, pakhat te tein bawhbel lamah chuan an putchhuak ta hlawm a.
Lalkunga leh a thurualpuite zawlbuk atang an chhuak fel ta maw tihah, Thangvunga leh Lalkhuma chu an tho ve nghal țham țham a, thingnawi bawm kiang ah chuan an ding a, pawnlam boruak chu an han thlingthla ren rawn a. Lalkunga te an liam fel tamaw tihah zawlbuk atang an chhuak ve nghal a. Chhuara an hriamhrei leh silai an dah chu an la lawk a, hmanhmawh takin feh kawng lamah chuan an liam thla ve nghal a. Thla a eng kher mai a, feh kawng pawh thui tawk tak a hmuh theih avangin Thangvungate țhiandun chuan thing hlim an bel zauh zauh a.
Aivela sih tlakthlakna zawn an thlen chuan Lalkunga teho chu kawng sira charpui kung hnuaiah thlam an thlen huna an chetdan tur relin an lo țhu khawm țaih mai a. Thangvunga te țhiandun chuan, anni ho chu kawngchhak lam atangin an hel a, an hmakhalh ta a. Thangvunga'te țhiandun chu hmanhmawh takin an kal hlawk hlawk a. Sairuma thlam zawn an thlen chuan, khuan hmasa a khuang thliai thliai tawh a.
Thlam chhaka khiang buk hnuaiah chuan ngawi rengin an ding a. Thangvunga chuan thlam chu a thlir thla vauh vauh a, a hawi kual a, chunglai hmunah chuan khawvel hi a reh vung vung ni hian a hria a. Darpuii tawmna nia an sawi, rampalailenga thlam khawhar tak lo mal din ngawk mai Thangvunga'n a han hmuh chuan, Darpuii chu a khawngaih em em a, Pasaltha lunglian niin, thangchhuah saserh kap kim tawh leh, ral that chhawn hial lo tawn tawh mah nise, Darpuii chan chauhzia leh retheihzia a hmuh chuan a mittui a hnap sawk mai a ni.
Darpuii tawmna thlam chu zuk pawh chawt nge țha ang tih an ngaihtuah lai chuan, an dinna atanga kawng chhak lam, dumde ruang chen vel awma hlaah hian thil phezauh an hmu a, mihring țawng thawm an hre nghal zat bawk a. Thangvunga chuan Lalkhuma chu hnung lamah a pawt then lawp mai a, an thiandun chuan hnung lama khiang thing, diar vet tiat zeta lianah chuan an inphen nghal a. Inring ranin chhaklam chu an thlir reng a, chutihlai chuan, khawvel hi a ngawi țhuap hian an hria a.
Thlam chhunga amah chauhva mu Darpuii chu vawilehkhatah a mutui lai a harh hlawl a. Mak tak maiin a kiangah tu emaw rawn awm ve tlat ni hian a hria a. A Nî thla khan a rawn tiharh ni ngeiin a ring a, muzui tawh lovin thlam sut nghengin a thu ngawi reng a.
Thangvunga chuan Lalkungate rawn thlen hma ngeia thlam chu zuk luh mai a duh a. Chutih lai tak chuan chhak lam atang Lalkungate ho chu an rawn lang ta a. Lalkunga chuan hma a rawn hruai a, chhantu neilo hmeichhe pakhat thah tuma thawkchhuak ni hlawm mahse, tihfuh loh chuan hlawhchham thei an nih avangin thawm an dim thiam ngei mai.
Lalkunga chuan Kaphleia leh Thangsiama chu thlam zuk thlithlai hmasa turin a tir a, anni chuan lung vawm phak vela hla atangin an lo țhlir reng a. Kaphleia te pahnih chuan thawm dim takin thlam chu an pan a, thlam kailawn hnuaiah an țhu a. Chutah Kaphleia chu kailawnah muangchangin a han lawn chho va, thlam leikâ a rap ta maw tihah thlam chhak lam atangin thuntling ri tih hriat zet mai hian silai a puak țhuai a, Kaphleia chu a hlawm thla nghal tawp mai a. Thlam hnuai a țhu Thangsiama chu hlau thlabarin a tlanchhuak a.
Thangvunga chu a thutna hmun atang chuan a zuangchhuak a, thlam chhungah chuan a lut nghal a. Chutih lai chuan Lalkunga te chu an tawmna hmun atang an rawn chhuak a, thlam chhunga Thangvunga chu kah an tum a; nimahse, Thangvunga thian Lalkhuma chuan Lalkunga hmaa ding, tlangval pakhat chu a kap thal leh tawp mai a. Lalkungate chu an tlanchhe ta a ni.
Thlam chhunga Thangvunga a han luh chuan Darpuii chuan ral emaw tiin a lo hlau ngang mai a, kil khatah a khur zawih zawih mai a. Thangvunga chuan,"Puii", tih leh pawm a rual a, hmanhmawh takin a kaichhuak a. Thlam thlanga phulraw hmun lam pan chuan an tlanpui nghal a.
Chhunzawm leh tur...
No comments